މޯލްޑިވްސް ފައިނޭންޝަލް އެކްސްޕޯ 2017 ދަރުބާރުގޭގައި މިއަދު ފަށައިފިއެވެ.
ދަރުބާރުގޭގައި ބޭއްވެވި ރަސްމިއްޔާތެއްގައި މޯލްޑިވްސް ފައިނޭންޝަލް އެކްސްޕޯ 2017 ރަސްމީކޮށް ހުޅުއްވައިދެއްވީ މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުހައްމަދު މުއިއްޒުއެވެ.
ތިރީހަށްވުރެ ގިނަ ސްޓޯލްއާއެކު ހުޅުވި މޯލްޑިވްސް ފައިނޭންޝަލް އެކްސްޕޯއަކީ އާއްމުންގެ މެދުގައި މާލީ އަދި އިޤްތިޞާދީ ކަންކަމާ ބެހޭގޮތުން ހޭލުންތެރިކުރުމާއި، އާއްމުންނާއި މާލީ އިދާރާތަކުގެ ގުޅުން އިތުރަށް ބަދަހި ކުރުމަށް މަގުފަހިކުރުންކަރުމުގެ މަޤްސަދުގައި ބާއްވާ އެކްސްޕޯއެކެވެ.
މި އެކްސްޕޯގައި ގެދޮރު ގަތުމަށާއި، ގެދޮރު ޢިމާރާތްކުރުމަށް ހުރި ފުރުޞަތުތަކާއި، މާލީ އިދާރާތަކުން އެކަމަށް ފައިނޭންސް ހޯދޭނެ ގޮތްތަކާއި ބެހޭގޮތުން މައުލޫމާތު ދިނުމަށް ވަނީ ހަމަޖެހިފައެވެ. ހައުސިންގ ޑިވެލޮޕްމަންޓް ކޯރޕަރޭޝަން، އެޗްޑީސީ އާ ގުޅިގެން ބާއްވާ މި އެކްސްޕޯގެ މިއަހަރުގެ ތީމްއަކީ، "ހައުސިން އެންޑް ފައިނޭންސް"އެވެ.
ފައިނޭންޝަލް އެކްސްޕޯ ހުޅުވުމަށް ބޭއްވެވި ރަސްމިއްޔާތުގައި އެމްއެމްއޭގެ ގަވަރނަރ އަޒީމާ އާދަމްއާއި އެޗްޑީސީއާއި އެޗްޑީއެފްސީގެ އިސް ބޭފުޅުން، އަދި ރާއްޖޭގެ މާލީ އިދާރާތަކާއި ވިޔަފާރި ކުންފުނިތަކުގެ އިސްބޭފުޅުން ބައިވެރިވެވަޑައިގެންނެވިއެވެ.