އިންޑިއަން އިންޓަރނޭޝަނަލް ޓްރެވަލް މާރޓު، އައިއައިޓީއެމް ގައި ރާއްޖެއިން ބައިވެރިވެއްޖެއެވެ.
އިންޑިއާގެ ބެންގަލޫރުގައި ކުރިއަށްދާ މި ފެއަރގައި މޯލްޑިވްޑް އެސޯސިއޭޝަން އެފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މަޓާޓޯ އާއި އެކު މި ފެއަރގައި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ހަ ކުންފުންޏަކުން ބައިވެރިވެފައިވެއެވެ.
މިމަހުގެ އެކާވީހުން ތޭވީހަށް ކުރިއަށްދާ މި ފެއަރގައި މަޓާޓޯއިން ބައިވެރިވެފައިވަނީ އިންޑިއާގައި ރާއްޖެ އިތުރަށް އިޝްތިހާރުކޮށް، އެޤައުމުން ރާއްޖެއަށް އަންނަ ފަތުރުވެރިން އިތުރުކުރުމަށް ކަމަށް މަޓާޓޯއިން ހާމަކުރެއެވެ.
މިއަހަރުގެތެރޭގައި އިންޑިއާގައި ބޭއްވި ދެ ފެއަރއެއްގައި މަޓާޓޯއިން ބައިވެރިވެފައިވެއެވެ. އެގޮތުން މިއަހަރުގެ ފެބްރުއަރީމަހު އިންޑިއާގެ ނިއުދިއްލީގައި ބޭއްވި ސަޓޭ ފެއަރގައިވެސް މަޓާޓޯއިން ބައިވެރިވެފައިވެއެވެ.