ވޯލްޑް ލަގްޒަރީ ރެސްޓޯރެންޓްސް އެންޑް ސްޕާ އެވޯޑްސްގައި ރާއްޖޭގެ ރިޒޯޓެއްކަމަށްވާ، ޖުމެއިރާ ވިޓަވެލިއަށް ހަތަރު އެވޯޑެއް ލިބިއްޖެއެވެ.
އެގޮތުން އެ ރިޒޯޓުގެ ދެ ރެސްޓޯރަންޓަކާއި ސްޕާއަކަށް ހަތަރު ދާއިރާއަކުން އެވޯޑު ލިބިފައިވެއެވެ. އެ ރިސޯޓުގެ ފިނިސް ރެސްޓޯރަންޓަށް އެވޯޑު ލިބުނީ ބެސްޓު ފްރެންޗް ކުޒިން ކޮންޓިނެންޓް އަދި ބެސްޓު އެންބިއެންސް/ރޮމޭންޓިކް އެޓްމޮސްފިއާ އިންޑިއަން އޯޝަން ރީޖަންގެ ދާއިރާއިންނެވެ. ސްވަރްނާ ރެސްޓޯރަންޓަށް އެވޯޑު ލިބުނީ ބެސްޓު އިންޑިއަން ކުޒީން ކޮންޓިނެންޓު ދާއިރާއިންނެވެ.
img:http://s4.psmnews.mv/images/660x400/15014079697486.jpeg|ވޯލްޑް ލަގްޒަރީ ރެސްޓޯރެންޓްސް އެންޑް ސްޕާ އެވޯޑްސް ލިބުނު ޖުމެއިރާގެ ރެސްޓޯރަންޓެއް
ވިޓަވެލީގެ ތަލިސީ ސްޕާއަށް އެވޯޑު ލިބުނީ ބެސްޓު ލަގްޒަރީ ވެލްނެސް ސްޕާގެ ދާއިރާއިންނެވެ. ވޯލްޑް ލަގްޒަރީ ރެސްޓޯރެންޓްސް އެންޑް ސްޕާ އެވޯޑަކީ ދުނިޔޭގެ އެކި ރިޒޯޓުތަކުގެ ރެސްޓޯރަންޓުތަކާއި ސްޕާތަކުން ދޭ ޚިދުމަތްތަކުގެ އަގުވަޒަންކުރުމުގެ ގޮތުން ކޮންމެ އަހަރަކު ދޭ އެވޯޑެކެވެ.
ޖުމެއިރާ ވިޓަވެލި ރިޒޯޓުގެ ޖެނަރަލް މެނޭޖަރ އަމިތް މަޖުމްދަރު ވިދާޅުވީ މި އެވޯޑަކީ އެ ރިސޯޓުގެ މުވައްޒަފުން ކުރާ ބުރަ މަސައްކަތުގެ ނަތީޖާކަމަށެވެ. އަދި އެ މުވައްޒަފުން ކުރާ ބުރަ މަސައްކަތް ދުނިޔޭގެ ފެންވަރުގައި ބަލައިގަންނާތީ ފަހުރުވެރިވާކަމަށްވެސް އަމިތް ވިދާޅުވިއެވެ.
ޖުމެއިރާ ވިޓަވެލި ރިސޯޓަށް މީގެކުރިންވަނީ ވޯލްޑް ޓްރެވެލް އެވޯޑުގައި އިންޑިއަން އޯޝަންސް ލީޑިން ލަގްޒަރީ ހޮޓެލް ވިލާގެ އެވޯޑުވެސް ލިބިފައެވެ.