ރާއްޖެއަށް ފަތުރުވެރިކަން ތަޢާރަފްވީ 1972 ވަނަ އަހަރުއެވެ. ޖުމްލަ 280 އެނދުގެ މައްޗަށް އެކުލެވޭ 2 ރިޒޯޓާއެކު ތަޢާރަފްވި މި ސިނާޢަތް، ފާއިތުވެދިޔަ 44 އަހަރުގެ ތެރޭގައި ފެންނަމުން މިދަނީ ތަރައްޤީވަމުން، ކުރިއަރަމުން އަންނަ ސިނަޢަތެއްގެ ގޮތުގައެވެ. އަދި ފާއިތުވެދިޔަ ދެތިން އަހަރު މި މަންޒަރު ފެންނަމުން ދަނީ ކުރިއަށްވުރެ އެތައް ދުވެއްޔެއް ހަލުވިކޮށެވެ.
ތާފާސް ހިސާބުތަކަށް ބަލާއިރު 1972 ވަނަ އަހަރުން ފެށިގެން 2013 އަހަރުގެ ނިޔަލަށް ރާއްޖޭގައި ހިނަގަމުން ދިޔައީ 103 ރިޒޯޓެވެ. އެއީ ނިސްބަތުން އަހަރަކު 3 ރިޒޯޓްގެ މަގުން އަލަށް މާރކެޓަށް ރިސޯޓްތައް ނެރެވުނު ރޭޓެކެވެ. 1990 ވަނަ އަހަރުން 2013 ވަނަ އަހަރުގެ ނަޔަލަށް މާރކެޓަށް ނުކުމެފައިވަނީ 45 ރިޒޯޓެވެ. އެއީ އަހަރަކު 2 ރިޒޯޓުގެ ނިސްބަތުންނެވެ. ނަމަވެސް 2013 ވަނަ އަހަރުގެ ޑިސެމްބަރުން ފެށިގެން މި ސިނާޢަތަށް ނުކުތް ރިޒޯޓްތަކުގެ އަދަދު ވަނީ އިތުރުވެގެން ގޮސްފައެވެ. 2013 ވަނަ އަހަރުގެ ޑިސެންބަރު މަހުން ފެށިގެން މިހާތަނަށް މި ސިނާޢަތަށް މުޅިން އަލަށް 23 ރިޒޯޓެއް ވަނީ ނުކުމެފައެވެ. އެއީ އެވްރެޖްކޮށް އަހަރަކު 6 ރިޒޯޓްގެ ރޭޓުންނެވެ. މިއާއެކު ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ރިޒޯތުގެ އަދަދު ވަނީ 126 އަރާފައެވެ. ރިޒޯޓުތަށް ހުޅުވޭ މިންވަރި އިތުރުވެފަވާއިރު، 2013 ވަނަ އަހަރު ރާއްޖެއަށް ޒިޔާރަތްކުރީ އެއްމިލިޔަން އެއްސަތޭކަ ފަންސަވީސްހާސް ފަތުރުވެރިންނެވެ. ނަމަވެސް ފާއިތުވި 2016 ވަނަ އަހަރު ޒިޔާރަތްކުރި މިންވަރު ވަނީ އިތުރުވެފައެވެ. ފާއިތުވެދިޔަ އަހަރު ޒިޔާރަތްކުރީ އެއްމިލިޔަން ދުއިސައްތަ އައްޑިހަ ހަހާސް ފަތުރުވެރިންނެވެ. އެއީ 15 އިންސަތައިގެ ކުރިއެރުމެކެވެ. ފަހުގެ ހިސާބުތަކަށް ބަލާނަމަ މިއަހަރުގެ ޖޫންމަހުގެ ނިޔަލަށް ހަތްސަތޭކަ ފަންސާސް ހަތްހާސް ފައްސަތޭކަ ސާޅީސް ފަތުރުވެރިން ރާއްޖެ ޒިޔާރަތްކޮށްފައިވެއެވެ. މިއީ ހުސްވިއަހަރުގެ މި މުއްދަތާ އަޅާބަލާއިރު 6 އިންސައްތައިގެ ކުރިއެރުމެކެވެ. މިއަހަރުގެ ޖޫންމަހަށް އެކަނި ބެލިނަމަވެސް އައްޑިހަފަސް ހާހަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވެއެވެ. އެއީ ހުސްވި އަހަރަށްވުރެ 7.8 އިންސައްތަ ގިނަ އަދަދެކެވެ.
img:http://s3.psmnews.mv/images/660x400/14749647127032.jpg|ފަތުރުވެރިޔަކު ރާއްޖޭގައި - ފޮޓޯ: ހަފީޒާ/ޕީއެސްއެމް
މި ހިސާބުތަކުން ރާއްޖޭގެ ފަތުރުވެރިކަން ކުރިއަރަމުން އަންނަ ނިސްބަތް މިނެކިރާލެވެއެވެ. ފަތުރުވެރިކަމާބެހޭ ވަޒީރު މޫސާ ޒަމީރު ވިދާޅުވީ މި ކުރިއެރުން ފެއްނަމުން މި އަންނަނީ ފަތުރުވެރިކަމުގެ ސިނާޢަތް ކުރިއެރުވުމަށް ސަރުކާރުން ކުރިއަށްގެންދާ އެޖެންޑާގެ ނަތީޖާއެއްގެ ގޮތުންކަމަށެވެ. ފަތުރުވެރިކަމުގެ ސިނާއަތު މިހާރު ފަރިވަމުންދަނީ އިންޓަގުރޭޓެޑް ޓްއަރިޒަމަށްކަން ފާހަގަކުރައްވަމުން، މިނިސްޓަރ ޒަމީރު ވިދާޅުވީ އެފަދަ ބިޔަ މަސްރޫޢުތައް މާލެ ސަރަޙައްދުގައިވެސް ގިނަ އަދަދަކަށް ކުރިޔަށް ދާކަމަށެވެ.
ގިނަ އަދަދެއްގެ ރިސޯޓް ތަރައްޤީކުރުމުގެ މަސައްކަތް ރާއްޖޭގެ އެކި ކަންކޮޅުތަކުގައި ހިނގަމުން އަންނައިރު، ސަރުކާރުގެ އަމާޒަކީ ހިނގަމުން މިދާ ރިޔާސީ ދައުރު ނިމުގެ ކުރިން 50 ރިޒޯޓު ތަރައްޤީކޮށް ސިނާޢަތަށް ނެރުމެވެ. އޭގެ ތެރެއިން 23 ރިޒޯޓެއް ޚިދުމަތަށް ނުކުމެފައިވާއިރު، މިއަހަރުވެސް އިތުރު ރިޒޯޓްތައް ހުޅުވުމަށް އަންނަނީ ތައްޔާރުވަމުންނެވެ.
ރާއްޖޭގެ ފަތުރުވެރިކަމުގެ ސިނާޢަތަށް ބަލާއިރު ފަތުރުވެރިންނަށް ޚިދުމަތްދޭ 132 އުޅަންދު ނުވަތަ ސަފާރީ މިހާރު ޙަރަކާތްތެރިވަމުންދެއެވެ. އަދި 195 ޑައިވްސެންޓަރ ރަޖިސްޓްރީކޮށް ހިންގަމުންގެންދެއެވެ. ފަތުރުވެރިކަމުގެ އެކި ކަންކަމަށް 268 ޓްރެވަލް އެޖެންސީއެއް ރަޖީސްޓްރީކޮށްފަވާއިރު 450 އަށްވުރެގިނަ ހޮޓާ ނުވަތަ ގެސްޓްހައުސް ރަޖީސްޓްރީ ހިންގަމުންދެއެވެ. ރާއްޖޭގެ ރިސޯޓްތަކާއި ފަތުރުވެރިންނަށް ޚިދުމަތްދޭ މިފަދަ ވަޞީލަތްތަކާއި ތަންތަން އިތުރުވަމުންދާއިރު މިދާއިރާގައި އިންވެސްޓްކުރާ ފަރާތްތައްވެސް އަންނަނީ އިތުރުވަމުންނެވެ.