މޯލްޑިވިއަންގެ ދަތުރުތައް ސައުތު އެފްރިކާއަށް ފެށުމަށް ވިސްނަމުންދާ ކަމަށް އައިލެންޑް އޭވިއޭޝަނުން ހާމަކޮށްފިއެވެ.
އެގޮތުން ސައުތު އެފްރިކާގެ ޖޮހޭނަސްބަރގްއަށް މޯލްޑިވިއަންގެ ދަތުރުތައް ފެށުމަށްޓަކައި، މާކެޓް ދިރާސާ ކުރުމަށް މޯލްޑިވިއަންގެ ޓީމެއް އެޤައުމަށް ގޮސްފައިވާ ކަމަށާއި، ސައުތު އެފްރިކާއިންވެސް ރާއްޖެއަށް ޓީމެއް އައިސްފައިވާ ކަމަށް އައިލެންޑް އޭވިއޭޝަނުން ބުނެއެވެ.
އެހެން ނަމަވެސް ސައުތު އެފްރިކާއަށް ދަތުރުތައް ފެށުމާއި ގުޅޭގޮތުން އަދި ގޮތެއް ނުނިންމާ ކަމަށާއި މިހާތަނަށް ކުރި ދިރާސާތައް ވަރަށް ޕޮސިޓިވް ކަމަށް އެކުންފުނިން ބުނެއެވެ. އަދި މޯލްޑިވިއަންގެ ދަތުރުތައް ސައުތު އެފްރިކާއަށް ފެށުމަށް ގޮތެއް ނިންމާ ހިސާބުން، ފަސް މަސް ދުވަހުތެރޭ ދަތުރުތައް ފެށޭނެ ކަމަށް އައިލެންޑް އޭވިއޭޝަނުން ހާމަކުރެއެވެ.
ޤައުމީ އެއަރލައިން މޯލްޑިވިއަނުން އަންނަނީ ބައިނަލްއަޤްވާމީ 10 މަންޒިލަކަށް ދަތުރުކުރަމުންނެވެ. އެއީ ޗައިނާގެ ހަ ސިޓީއަކަށާއި، ތައިލެންޑްގެ ބެންކޮކަށާއި، ބަންގްލަދޭޝްގެ ޑާކާގެ އިތުރުން އިންޑިއާގެ ޓްރިވެންޑްރަމާއި ޗެންނާއީއެވެ.