ރާއްޖޭގެ ފަތުރުވެރިކަމުގެ ސިނާއަތުގެ ކުރިއެރުމަށް ހުރަސްއެޅުމަށް އިދިކޮޅު ފަރާތްތަކުން މަސައްކަތް ކުރަމުން ދިޔަ ނަމަވެސް ފަތުވެރިކަން އިސްތިހާރުކުރުމަށް ސަރުކާރުން ކުރަމުންދާ މަސައްކަތުން ކުރިއެރުންތަކެއް ލިބެމުން އަންނަކަމަށް އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ވިދާޅުވެއްޖެއެވެ.
ދިވެހިންގެ ގިނަ ބަޔަކު ފަތުރުވެރިކަމުގެ ސިނާއަތަނަށް ބަރޯސާވާއިރު، އިދިކޮޅު ފަރާތްތަކުން ކުރަމުންދާ މަސައްކަތުގެ ސަބަބުން، އޭގެ ނޭދެވޭ އަސަރު ދިވެހި އާއްމު ރައްޔިތުންނަށް ކުރަމުން އަންނަކަން ހާރިސް ފާހަގަކުރެއްވިއެވެ.
ރާއްޖޭގެ ފަތުރުވެރިކަން އިޝްތިހާރުކުރުމަށް މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަންސް، އެމްއެމްޕީއާރުސީން އަންނަނީ ބައިނަލް އަޤްވާމީ އެކިއެކި ފެއަރތަކުގައި ބައިވެރިވަމުންނެވެ. އަދި ޑިޖިޓަލް މީޑިއާ ބޭނުންކޮށްގެން ތަފާތި ކެމްޕެއިންތައް ގެންދަނީ ހިންގަމުންނެވެ. އަދި ބޭރު ޤައުމުތަކުގައި ޤާއިމްކޮށްފައިވާ ރާއްޖޭގެ ހުރިހާ ފޮރިން މިޝަންތަށް މެދުވެރިކޮށްވެސް ރާއްޖެ އިޝްތިހާރު ކުރުމުގެ މަސައްކަތް އަންނަނީ ކުރަމުންނެވެ.
ޕީއެސްއެމް ނިއުސްއަށް ދެއްވި ޙާއްސަ އިންޓަރވިއުއެއްގައި އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ވިދާޅުވީ ރާއްޖޭގެ ފަތުރުވެރިކަން އިޝްތިހާރުކޮށް، ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް ގިނަ މަސައްކަތްތަކެއް ކުރަމުން ގެންދާކަމަށެވެ. އެހެން ނަމަވެސް ރާއްޖޭގެ ފަތުރުވެރިކަން ކުރިއެރިޔަ ނުދިނުމަށް ކުރާ މަސައްކަތްތަކުގެ ސަބަބުން ރާއްޖޭގެ ފަތުރުވެރިކަމަށް އަސަރުކުރަމުން އަންކަމަށެވެ. އަދި ރާޢްޖޭގެ ފަތުވެރިކަން ނެތިކޮށްލުމަށް ކުރާ މަސައްކަތުގައި ބއެއް ދިވެހިން ބައިވެރިވާއިރު މި ކަމުގެ ސަބަބުން ދިވެހިންނަށް ބޮޑެތި ގެއްލުންތަކެއް ލިބިގެންދާނެކަން ހާރިސް ފާހަގަކުރެއްވިއެވެ.
ހާރިސް ވިދާޅުވީ ހުރިހާ ގޮންޖެހުންތަކާއި އެކުވެސް ކުރަމުންދާ މަސައްކަތްތަކުގެ ސަބަބުން ރާއްޖޭގެ ފަތުރުވެރިކަމަށް އެދެވޭ ކުރިއެރުންތަކެއް ލިބެމުން އަންކަމަށެވެ. މިއަހަރުގެ ތެރޭގައި މުޙިއްމު ތިން ފެއަރއެއގައި އެމްއެމްޕީއާރުސީން ބައިވެރިވާނެކަމަށް އެ ކޯޕަރޭޝަނުން ބުނެއެވެ. އެ ފެއަރތަކަކީ ސެޕްޓެމްބަރމަހު ފްރާންސްގައި އޮންނަ ޓޮޕް ރޭސާ ފެއަރއާއި އޮކްޓޫބަރުމަހު އިޓަލީގެ ރިމިނީގައި އޮންނަ ފަތުރުވެރިކަމުގެ ފެއަރއެއްގެ އިތުރުން، އިނގިރޭސިވިލާތުގެ ލަންޑަންގައި ބާއްވާ ޑަބްލިއު ޓީއެމް ފެއަރއެވެ.