މިއަހަރުގެ ސެޕްޓެމްބަރުމަހު ބާއްވާ ދެވަނަ ގެސްޓްހައުސް ކޮންފަރެންސްގައި ބައިވެރިވުމަށް މިހާތަނަށް ސަތޭކައަށް ވުރެ ގިނަ ފަރާތުން ރަޖިސްޓްރީވެފައިވާ ކަމަށް މޯލްޑިވްސް ގެޓަވޭސްއިން ބުނެފިއެވެ.
ސެޕްޓެމްބަރުމަހުގެ ތޭވީސްވަނަ ދުވަހު ދަރުބާރުގޭގައި ބާއްވާ ގެސްޓްހައުސް ކޮންފަރެންސްއަކީ ރާއްޖޭގެ ގެސްޓްހައުސް ވިޔަފާރީގައި ޙަރަކާތްތެރިވާ ފަރާތްތަށް އެއްތަނަކުން ބައްދަލުވެވޭނެ މާޙައުލެއް ޤާއިމުކޮށްދީ، ގުޅިގެން މަސައްކަތްކުރެވޭނެ ގޮތްތަކެއް ފަހިކޮށްދިނުމުގެ މަޤްސަދުގައި ބާއްވާ ކޮންފަރެންސެކެވެ.
މި ކޮންފަރެންސް އިންތިޒާމް ކުރާ، މޯލްޑިވްސް ގެޓަވޭޒްއުން ބުނީ މިއަހަރުގެ ކޮންފަރެންސްގައި ދުއިސައްތައަށް ވުރެގިނަ ފަރާތުން ބައިވެރިވާނެ ކަމަށެވެ. ކޮންފަރެންސްގައި ބައިވެރިވާން ބޭނުންވާ ފަރާތްތަކަށް ރަޖިސްޓްރީވުމުގެ ފުރުސަތު މިމަހުގެ ނިޔަލަށް ހުޅުވާލައިފައިވާއިރު ގެސްޓްހައުސް މޯލްޑިވްސް މެގަޒިންގެ 2018 ވަނަ އަހަރުގެ އަދަދުގައި ލިސްޓުކުރާ ގެސްޓްހައުސްތަކަށް، ގެސްޓްހައުސް ކޮންފަރެންސްގައި ހިލޭ ބައިވެރިވެވޭނެ ކަމަށް މޯލްޑިވްސް ގެޓަވޭސްއިން ބުނެއެވެ.
ގެސްޓްހައުސް ކޮންފަރެންސްގައި ވިޔަފާރި އާއި ނެޓްވޯކިންގް ބައްދަލުވުންތަކާއި އެޑިއުކޭޝަން ސެޝަންތައް ކުރިއަށް ގެންދިޔުމަށް ރާވާފައިވާ ކަމަށް މޯލްޑިވްސް ގެޓަވޭސްއިން ހާމަކުރެއެވެ.