ފުޅާ ދާއިރާއެއްގައި ލޯކަލް ޓޫރިޒަމް ކުރިއަރަމުން ވ.ކެޔޮދޫން އަހަރުގެ ފަހުކޮޅު އަންނަ ފަތުރުވެރިކަމުގެ ސީޒަނަށް ތައްޔާރުވުމުގެ މަސައްކަތް ފަށައިފިއެވެ.
ރާއްޖެއަށް ލޯކަލް ޓުއަރިޒަމް ތަޢާރަފްވެ ކުރިއަރަމުން އަންނައިރު ފުޅާދާއިރާއެއްގައި އެކަން ހިނގަމުންދާ އެއް އަތޮޅަކީ ވ.އަތޮޅެވެ. އެއަތޮޅުގައި ފުޅާދާއިރާއެއްގައި ލޯކަލް ޓުއަރިޒަމްގެ މަސައްކަތް ކުރަމުންދާއިރު އޭގެ ތެރެއިން ފާހަގަކޮށްލެވޭ އެއް ރަށަކީ ކެޔޮދޫއެވެ. ގިނަ އަދަދަކަށް ގެސްޓްހައުސްތައް ހުންނަ ކެޔޮދޫގައި މި ވިޔަފާރި ތަރައްޤީކުރުމަށް ވަނީ ކޮމެޓީއެއް އުފައްދާފައެވެ.
އެ ކޮމެޓީއަކީ ރަށުގައި އޮޕަރޭޓްކުރަމުންގެންދާ ގެސްޓްހައުސްތަކުގެ މެދުގައި ނަގަފާއިވާ ކެމެޓީއެކެވެ. ކެޔޮދޫ ކައުންސިލްގެ ރައީސް އަޙުމަދު ޔޫސުފް ވިދާޅުވީ ކޮމެޓީގެ މަސައްކަތަކީ ލޯކަލް ޓުއަރިޒަމް އިތުރަށް ތަރައްޤީކޮށް ދެމެހެއްޓެނިވި ގޮތެއްގައި ކުރުމަށް ކައުންސިލާއި ގުޅިގެން މަސައްކަތް ކުރުންކަމަށެވެ. މިގޮތުން މިހާރުވެސް އެފަދަ މަސައްކަތްތަކެއް ހިނގަމުންދާކަމަށާއި، އެ މަސައްކަތް ކުރަމުންގެންދަނީ ރަށަށް ޒިޔާރަތްކުރާ ފަތުރުވެރިންގެ ބޮލަކަށް ދުވާލަކަށް ނަގަމުންގެންދާ ފީންކަމަށެވެ. ކެޔޮދޫއަށް ޒިޔާރަތްކުރާ ފަތުރުވެރިންގެ ބޮލަކަށް 2 ޑޮލަރުގެ ފީއެއް ދަނީ ނަގަމުންނެވެ.
ލޯކަލް ޓުއަރިޒަމްއިން ކެޔޮދޫއަށް ބޮޑެތި ފައިދާތަކެއް ލިބޭއިރު، މިކަމުގެ ސަބަބުން ރަށުގައި ގިނަ އަދަދެއްގެ ވަޒީފާވެސް އުފެދިގެން ގޮސްފައިވާކަން ކައުންސިލްގެ ރައީސް ފާހަގަކުރެއްވިއެވެ. ކައުންސިލްގެ ތަފާސް ހިސާބުތަކުން ދައްކާގޮތުގައި ހުސްވި އަހަރުވެސް ރަށުންބޭރުގެ އެކި ތަންތާގައި ވަޒީފާ އަދާކުރަމުންދިޔަ 45 ވަރަކަށް ޒުވާނުން ރަށަށް ބަދަލުވެފައިވެއެވެ. ކެޔޮދޫގައި ގެސްޓްހައުސް ހިންގާ އަދި ގެސްޓްހައުސް ކޮމެޓީގައި ހިމެނޭ ފަރާތްތަކުވެސް ބުނީ ކޮމެޓީއެއް އޮތުމުގެ ނަތީޖާ ފެންނަމުންދާކަމަށެވެ.
ކެޔޮދޫގައި ލޯކަލް ޓުއަރިޒަމް ކުރިއެރުވުމުގެ ގޮތުން ކޮމެޓީން ގެންދަނީ ގިނަ މަސައްކަތް ކުރަމުންނެވެ. މިގޮތުން ކަނޑުއަޑީގެ ދާރުލް އާސާރެއް ހެދުމުގެ ދިރާސާތަށް ކުރިއަށްދާކަން ފާހަގަ ކޮށްލެވެއެވެ.