އެން ހޯދުމުގައި މަސްވެރިންނަށް ދިމާވާ ދަތިތައް ޙައްލުކުރަން އެމުގެ ގޮތުގައި ބޭނުންކުރެވޭ މަހުގެ ބާވަތެއް ކަމަށްވާ ބޭންގު އާލާކުރުމުގެ މަޝްރޫޢު ހުވަދުއަތޮޅު ފަޅުރަށެއް ކަމަށްވާ "މަޓު"ގައި ކުރިއަށް ގެންދަން ނިންމައިފިއެވެ.
މި މަސައްކަތް ކުރިޔަށް ގެންދިއުމުގެ ކުރިން އަޖުމަބެލުމުގެ ގޮތުން ފާދިއްޕޮޅު މާކޯގައި މަސައްކަތްތަކެއް މިހާރު ކުރިޔަށް އެބަދެއެވެ. މަސްވެރިން ޢާއްމުކޮށް އެމުގެ ގޮތުގައި ބޭނުންކުރަނީ ރެހި، ބޯދި، މުގުރާން ފަދަ ބައިބަޔަށް އުޅޭ ކުދިމަހުގެ ބާވަތްތަކެވެ. ނަމަވެސް ފަހަކަށް އައިސް ބައެއް މޫސުންތަކުގައި މި ބާވަތްތަކުގެ އެން ލިބުން ދަތިވާކަމަށް މަސްވެރިން ބުނެއެވެ.
ބޭންގް އާލާކުރުމުގެ މަޝްރޫޢާ ގުޅޭގޮތުން ޕީއެސްއެމް ނިވްސްއަށް މައުލޫމާތުދެއްވަމުން މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑރ. މުޙައްމަދު ޝައިނީ ވިދާޅުވީ ދިފާއީ ބާރުގެ ބެލުމުގެ ދަށުގައި އޮންނަ، ޅ.އަތޮޅު މާކޯގައި އަޖުމަ ބެލުމުގެ މަޝްރޫއު މިހާރު ފަށައިގެން ކުރިއަށްދާ ކަމަށެވެ. މިނިސްޓަރ ޝައިނީ ވިދާޅުވީ ބޭންގު އާލާ ކުރުމުގެ މަޝްރޫއު ކުރިއަށް ގެންދިޔުމަށް ނިންމާފައިވާ ރަށް ކަމުގައިވާ ގއ. މަޓުގައި މިހާރު އެ މަސައްކަތް ފެށުމަށްޓަކަށް ވާން ޖެހޭ ތައްޔާރީތައް ވަމުންދާ ކަމަށެވެ. އެގޮތުން އެރަށުގައި އެ މަޝްރޫއު ކުރިއަށް ގެންދިޔުމަށް ބޭންގު ހެޗަރީގެ ސައިޓް ފަރުމާ ކުރުމުގެ މަސައްކަތް ކުރިއަށްދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ޝައިނީ ވިދާޅުވީ މިމަޝްރޫޢުގައި އެންމެ ބޮޑު އިސްކަމެއް ދެއްވާނީ މަސްވެރިންނަށް ބޭންގް ފަސޭހައިން ލިބޭނެ ފަދަ ގޮތަކަށް މަޝްރޫޢު ކުރިއަށްގެންދެވުމަށް ކަމަށެވެ. ބޭންގް އާލާކުރުމުގެ މަޝްރޫޢު ރާއްޖޭގެ ހަތަރު ސަރަޙައްދެއްގައި ކުރިއަށް ގެންދަވަން ސަރުކާރުން ވަނީ ނިންމާފައެވެ.
މަސްވެރިކަމުގައި ބޭނުންކުރާ އެމުގެ ގޮތުގައި ބޭންގް ބޭނުން ކުރެވޭނެކަން ދިރާސާތަކުން ދައްކައެވެ.