އިންޑިއާ ފަތުރުވެރިންގެ މެދުގައި ހަނީމޫން ހޭދަކޮށްލަންދާން އެންމެ ކަމުދާ މަންޒިލްތަކުގެ ލިސްޓުގެ ދެވަނައިގައި ރާއްޖެ ހިމެނިއްޖެއެވެ.
އިންޑިއާގެ މަޝްހޫރު ޓްރެވަލް ބުކިންގ ވެބްސައިޓެއް ކަމަށްވާ "އީޒީގޯވަން" އިން ކުރިއަށް ގެންދިޔަ ދިރާސާއަކުން ދައްކާގޮތުން، ހަނީމޫން ހޭދަކުރަން އިންޑިއާ ފަތުރުވެރިންގެ މެދުގައި އެންމެ މަޤްބޫލީ ޖަޒީރާ މަންޒިލްތަކެވެ. އެގޮތުން މިއަހަރުގެ ޖެނުއަރީން ފެށިގެން ޖޫންމަހުގެ ނިޔަލަށް އެންމެ ޑިމާންޑް ބޮޑު މަންޒިލަކީ އިންޑޮނޭޝިއާގެ ބާލީ ކަމަށް އީޒީގޯވަން އިން ހާމަކުރެއެވެ.
ދެވަނައަށް ރާއްޖެ އައިސްފައިވާއިރު ތިންވަނަ އަށް އެންމެ ޑިމާންޑު ބޮޑު މަންޒިލަކީ ތައިލެންޑް ކަމަށްވެސް އެވެބްސައިޓުން ހާމަކުރެއެވެ.
އީޒީގޯވަން އިން ފާހަގަކުރާގޮތުގައި ރާއްޖެއަކީ ބޮލީވުޑްގެ ތަރިންގެ މެދުގައިވެސް މަޤްބޫލް މަންޒިލެއް ކަމަށާއި މި ސަބަބާއި ހުރެވެސް ރާއްޖެއަށް އޮންނަ ޑިމާންޑު ބޮޑުވަމުންދެއެވެ.
ރާއްޖެއަށް އަންނަ ފަތުރުވެރިންގެ އަދަދު އެންމެ ބާރު ދުވެއްޔެއްގައި އިތުރުވަމުން އަންނަ ޤައުމުތަކުގެ ތެރޭގައި އިންޑިއާ ހިމެނެއެވެ. ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ ހަމަސް ދުވަހުގެތެރޭ އިންޑިއާއިން ތިރީސް ހަތްހާހަށްވުރެ ގިނަ ފަތުރުވެރިން ރާއްޖެ އައިސްފައިވާއިރު މިއީ ހުސްވި އަހަރުގެ އެމުއްދަތާ އަޅާ ބަލާއިރު ފަންސަވީސް އިންސައްތަ އިތުރު އަދަދެކެވެ.