މި އަހަރުގެ ޖުލައިމަހު އެމިރޭޓްސްގެ ފްލައިޓްތަކުގައި އިނގިރޭސިވިލާތުން ދަތުރުކޮށްފައިވާ ފަތުރުވެރިންގެ އަދަދު ރެކޯޑް އަދަދަކަށް އިތުރުވެ، ފަސިންޖަރުންގެ މެދުގައި އެންމެ މަޤްބޫލް މަންޒިލްތަކުގެ ތެރޭގައި ރާއްޖެ ހިމެނިފައިވާކަމަށް އެ އެއަރލައިނުން ބުނެފިއެވެ.
އެމިރޭޓްސްއުން އަންނަނީ އިނގިރޭސިވިލާތުގެ 6 ސިޓީއަކަށް ދަތުރުކުރަމުންނެވެ. މި 6 ސިޓީއިން ޖުމްލަ ދުއިސައްތަ ފަސްދޮޅަސް ފަސް ހާހަށްވުރެ ގިނަ ފަސިންޖަރުން ވަނީ ދަތުރުކޮށްފައެވެ. އަދި އެއަރލައިންގައި އިނގިރޭސިވިލާތުން އެންމެ ގިނަ އަދަދަކަށް މީހުން ދަތުރުކޮށްފައިވަނީ ދުބާއީއަށް ކަމަށާއި ދުބާއީގައި ޓްރާންސިޓްކުރުމަށްފަހު އެންމެ ގިނަ އަދަދަކަށް އެމިރޭޓްސްގެ ފްލައިޓްތަކުގައި ދަތުރުކޮށްފައިވަނީ، ބެންކޮކަށާއި، ޕުކެޓްއަށާއި، މޮރިޝަސް، ދިވެހިރާއްޖެއަށާއި ބާލީއަށް ކަމަށް އެމިރޭޓްސުން ބުނެއެވެ.
ޔުނައިޓެޑު އެރަބް އެމިރޭޓްސްގެ އެއަރލައިންނެއް ކަމަށްވާ އެމިރޭޓްސްއިން އަންނަނީ ރާއްޖެއާއި ދުބާއީއާ ދެމެދު އަދި ރާއްޖެއާއި ސްރީލަންކާއާ ދެމެދު ދަތުރުތައް ކުރަމުންނެވެ. އެމިރޭޓްސްއިން ދުވާލަކު 4 ދަތުރު ރާއްޖެއަށް ކުރާއިރު، މި ދަތުރުތަކުން ދުނިޔޭގެ 150 އަށްވުރެ ގިނަ ޤައުމާ ރާއްޖެ ގުޅުވައިދެއެވެ.
އިނގިރޭސިވިލާތަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ރާއްޖެއަށް ޒިޔާރަތްކުރާ ޤައުމުތަކުގެ ތެރޭގައި ހިމެނޭ ޤައުމެކެވެ. ރާއްޖޭގެ ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ޖޫންމަހުގެ ނިޔަލަށް އިނގިރޭސިވިލާތުން ރާއްޖެއަށް ފަންސާސް އެއްހާހަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.