ކާގޯ ބޯޓަކަށް ކޮންޓޭނަރ ބަރުކުރަމުން ދަނިކޮށް ރޭ ހިނގި ހާދިސާއަކީ ކޮންޓޭނަރު ވެއްޓި، ނުވަތަ ކޮންޓޭނަރ އަރިއަޅާލައިގެން ހިނގި ހާދިސާ އެއް ނޫން ކަމަށް އެމްޕީއެލުން ހާމަކޮށްފިއެވެ.
މި ހާދިސާގައި އެމްޕީއެލްގެ މުވައްޒަކަށް ވަނީ އަނިޔާވެފައެވެ.
މޯލްޑިވްސް ޕޯޓްސް ލިމިޑެޓް، އެމްޕީއެލުން މިކަމާއި ގުޅޭގޮތުން ނެރެފައިވާ ނޫސްބަޔާނެއްގައި ބުނެފައިވަނީ އެ ކުންފުނިން އަބަދުވެސް މާލޭ ވިޔަފާރި ބަނދަރުގައި މަސައްކަތްކުރާ އެ ކުންފުނީގެ މުވައްޒަފުންނާއި، އެހެން ފަރާތްތަކުގެ ސަލާމަތާއި ރައްކާތެރިކަމަށް ވަރަށް ބޮޑު އަޙައްމިޔަތުކަމެއް ދޭ ކަމަށެވެ.
އެހެން ނަމަވެސް ކާގޯ ބޯޓުތަކަށް ކޮންޓޭނަރ ލޯޑް ކުރުމާއި އަންލޯޑް ކުރުމަކީ އޭގެ ޒާތުގައި "ރިސްކް" ބޮޑު މަސައްކަތަކަށްވާއިރު، މިފަދަ ހާދިސާއެއް މަދުން ނަމަވެސް ހިނގުމަކީ އެކަށީގެންވާ ކަމެއް ކަމަށް އެމްޕީއެލުން ބުނެއެވެ.
ރޭގެ ހާދިސާ ދިމާވިއިރު، އެ ހާދިސާގައި ޒަހަމްވި މުވައްޒަފުވެސް ސަލާމަތީ ގޮތުން ފުރިހަމަކުރަންޖެހޭ ހުރިހާ ކަމެއް ފުރިހަމަކޮށްފައިވާ ކަމަށާއި، އެކުންފުނިން އަމަލުކުރަމުންދާ ސަލާމަތީ ގަވާއިދުތަކުގެ ތެރެއިން، އެއްވެސް ކަމެއް ފުރިހަމަ ނުވާ ކަމެއް މިހާތަނަށް ފާހަގަކުރެވިފައި ނުވާ ކަމަށްވެސް އެމްޕީއެލްގެ ނޫސް ބަޔާނުގައިވެއެވެ. އަދި މި ހާދިސާ ހިނގަން ދިމާވި ސަބަބު އިތުރަށް ތަހްޤީޤްކުރަމުންދާ ކަމަށްވެސް އެމްޕީއެލްއިން ބުނެއެވެ.
ކޮންޓެއިނާތަކެއް ބޯޓަކަށް ލޯޑް ކުރަން އުޅުމުގެ ތެރޭގައި ރޭ ހިނގި ހާދިސާގައި އަނިޔާވެފައިވަނީ އެމްޕިއެލްގައި މަސައްކަތްކުރާ ދިވެއްސަކަށެވެ.
މި ހާދިސާގައި އޭނާގެ އެއް ފަޔަށް ވަރަށް ބޮޑަށް އަނިޔާވެފައިވެއެވެ.
މި ހާދިސާގައި އަނިޔާވި މުވައްޒަފުގެ ސިއްޙީ ފަރުވާގެ ކަންތައްތައް ބަލަހައްޓަމުންދަނީ އެމްޕީއެލުންނެވެ.