ޕާޓާ ޓްރެވަލް މާރޓުގައި މަޓާޓޯއާއި އެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ހަތަރު ފަރާތަކުން ބައިވެރިވާނެ ކަމަށް މަޓާޓޯއިން ހާމަކޮށްފިއެވެ.
މިމަހުގެ 13 އިން 15 އަށް ޗައިނާގެ މަކާއޯގައި ބާއްވާ ޕާޓާ ޓްރެވަލް މާރޓަކީ އޭޝިއާ ޕެސިފިކް ޤައުމުތަކަށް އަމާޒްކޮށްގެން ބާއްވާ ފެއަރއެކެވެ.
ޕާޓާ ޓްރެވަލް މާރޓާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތުދެމުން، މަޓާޓޯގެ ރައީސް އަބްދުﷲ ޤިޔާސް ވިދާޅުވީ، ޕާޓާ ޓްރެވަލް މާރޓަކީ އެހެން ޓްރެވަލް ފެއަރތަކާއި ތަފާތު ފެއަރއެއް ކަމަށެވެ. އަދި މި ޓްރެވަލް ފެއަރގައި ރާއްޖެއާ ގުޅުންހުރި ވަރަށް ބޮޑު ކަމެއް ޢިއުލާން ކުރުމަށް ހަމަޖެހިފައިވާ ކަމަށްވެސް ޤިޔާސް ވިދާޅުވިއެވެ.
މަޓާޓޯއިން ވަނީ މިއަހަރުގެ މިހާތަނަށް ބައިނަލްއަޤްވާމީ 8 ފެއަރއެއްގައި ބައިވެރިވެފައެވެ. އަދި ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ކޮންމެ ވެސް ދެ ޤައުމެއްގައި ރޯޑް ޝޯތަކެއް ބޭއްވުމަށް މަޓާޓޯއިން ދަނީ ރާވާމުންނެވެ.