މިއަހަރުގެ ޖުލައިމަހުގެ ނިޔަލަށް ރަޝިއާއިން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދަށް ބޮޑު ކުރިއެރުމެއް ލިބިއްޖެއެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާގޮތުން މިއަހަރުގެ ޖުލައިމަހުގެ ނިޔަލަށް ރަޝިއާއިން ތިރީސް ހަތަރުހާސް ހަތް ސަތޭކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ ހުސްވި އަހަރުގެ މި މުއްދަތުގައި ރަޝިއާއިން ރާއްޖެއަށް ޒިޔާރަތްކުރި ފަންސަވީސް ހާސް އަށްސަތޭކައަށް ވުރެ 35 އިންސައްތަ އިތުރު އަދަދެކެވެ.
ރާއްޖެއަށް ޒަމާނުއްސެރެ އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ޔޫރަޕްގެ ޤައުމުތަކުންނެވެ. މިއަހަރުގެ ޖުލައިމަހުގެ ނިޔަލަށް ޔޫރަޕުން ރާއްޖެއަށް ތިންސަތޭކަ ފަސްދޮޅަސްދެހާހަށް ވުރެ ގިނަ ފަތުރުވެރިން އައިސްފައިވޭ، މިއީ ހުސްވި އަހަރުގެ މިމުއްދަތާ އަޅާ ބަލާއިރު ދިހަ އެއް އިންސައްތަ އިތުރު އަދަދެކެވެ.
ޔޫރަޕްގެ ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމުތަކަކީ، ޖަރުމަންވިލާތް، އިނގިރޭސިވިލާތް، ފްރާންސް، ރަޝިއާ އަދި އިޓަލީ. މިއަހަރުގެ ޖުލައިމަހުގެ ނިޔަލަށް ޔޫރަޕްގެ ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ޖަރުމަންވިލާތުންނެވެ. ޖަރުމަންވިލާތުން ރާއްޖެއަށް ފަސްދޮޅަސް ހާހަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.
ޔޫރަޕްގެ ޤައުމުތަކުގެ ތެރެއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް އެންމެ ބޮޑު ކުރިއެރުމެއް ލިބިފައިވަނީ ރަޝިއާއަށެވެ. އެގޮތުން ރަޝިއާއިން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދު ވަނީ ހުސްވި އަހަރުގެ ފުރަތަމަ ހަތްމަސްދުވަހާ އަޅާ ބަލާއިރު ތިރީސް ފަހެއް އިންސައްތަ އިތުރުވެފައެވެ.
ދެން އެންމެ ބޮޑު ކުރިއެރުމެއް ލިބިފައިވަނީ އިޓަލީއިން ރާއްޖެއަށް އައި ފަތުރުވެރިންގެ އަދަދަށެވެ. މިއަހަރުގެ ޖުލައިމަހުގެ ނިޔަލަށް އިޓަލީއިން ރާއްޖެއަށް ފަންސާސް އެއްހާހަށްވުރެ ގިނަ ފަތުރުވެރިން ރާއްޖެއަށް އައިސްފައިވާ އިރު މިއީ ހުސްވި އަހަރުގެ މި މުއްދަތާ އަޅާ ބަލާއިރު ފަންސަވީސް އިންސައްތަ އިތުރު އަދަދެކެވެ.