ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އެންމެ ބޮޑަށް އިތުރުވަމުން އަންނަ ޤައުމުތަކުގެތެރޭގައި އިންޑިއާ ހިމެނެއެވެ.
މިއަހަރުގެ ޖުލައިމަހުގެ ނިޔަލަށް އިންޑިއާއިން ސާޅީސް ދެހާސް ނުވަސްތޭކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ އިރު މިއީ ހުސްވި އަހަރުގެ މި މުއްދަތާ އަޅާ ބަލާއިރު ތޭވީސް އިންސައްތަ އިތުރު އަދަދެކެވެ. ރާއްޖެއަށް ޒިޔާރަތްކުރާ ފަތުރުވެރިންގެ މުޅި ޖުމްލަ އަދަދުގެ ހަޔެއް އިންސައްތަ ހިއްސާ ކުރަނީ އިންޑިއާ ފަތުރުވެރިންނެވެ.
މަހުން މަހަށް ބަލާއިރު، މިއަހަރުގެ ޖުލައިމަހު އިންޑިއާއިން ރާއްޖެއަށް ފަސްހާސް ތިންސަތޭކައަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ މިއަހަރުގެ ޖޫންމަހު ރާއްޖެއަށް ޒިޔާރަތްކޮށްފައިވާ އިންޑިއާ ފަތުރުވެރިންގެ އަދަދު ކަމުގައިވާ ހަތަރުހާސް ހަތްސަތޭކަ އަށްވުރެ ތޭރަ އިންސައްތަ އިތުރު އަދަދެކެވެ.
އިންޑިއާ ފަތުރުވެރިންގެ މެދުގައި ރާއްޖެއަށް އޮންނަ މަޤްބޫލްކަން ދަނީ އިތުރުވަމުންނެވެ. އެގޮތުން އެޤައުމުގެ ޓްރެވަލް ބުކިންގ ވެބްސައިޓެއް ކަމަށްވާ، ސްކައިސްކޭނަރއިން ކުރިއަށްގެންދިޔަ ދިރާސާއަކުން ދައްކާގޮތުން 2017 ވަނަ އަހަރު އިންޑިއާ ފަތުރުވެރިންގެ މެދުގައި އެންމެ ބޮޑު މަޤްބޫލްކަމެއް ލިބިގެންދާނެ 5 މަންޒިލުގެ ތެރޭގައި ރާއްޖެ ހިމެނެއެވެ.