ޔުނެސްކޯގެ ބަޔޮސްފިއަރ ރިޒާވްއަކަށް ދިވެހިރާއްޖެ ހެދުމަށް ކުރާ މަސައްކަތުގައި ފަތުރުވެރިކަމުގެ ސިނާއަތުން އެއްބާރުލުން ދިނުމަށް ތޭރަ ރިސޯޓަކުން އެއްބަސްވެއްޖެއެވެ. މިއާއެކު ސަރުކާރާއި އެކު މިމަސައްކަތުގައި ބައިވެރިވާ ރިސޯޓުތަކުގެ އަދަދު ވަނީ ސާޅީސް ތިނަކަށް އަރާފައެވެ.
ޔުނެސްކޯގެ ބަޔޮސްފެއަރ ރިޒާވްއަކަށް ދިވެހިރާއްޖެ ހެދުމަށް ކުރާ މަސައްކަތުގައި އެއްބާރުލުން ދިނުމަށް އެއްބަސްވެ މިއަދު ޓޫރިޒަމް މިނިސްޓްރީއާއި އެކު ސޮއިކޮށްފައިވަނީ:-
- މިރިހި އައިލެންޑް ރިސޯޓު،
- ޖޭއޭ މަނަފަރު، ފަންއައިލެންޑް،
- ކުރުނބާ މޯލްޑިވްސް،
- ވެލައްސަރު މޯލްޑިވްސް،
- ބަރޮސް މޯލްޑިވްސް،
- ކަނދޮޅު އައިލެންޑް މޯލްޑިވްސް،
- ޓުވިން އައިލެންޑް،
- މިލައިދޫ އައިލެންޑް މޯލްޑިވްސް،
- ދިގަލި މޯލްޑިވްސް،
- އެނބޫދޫ މޯލްޑިވްސް،
ސަމަރ އައިލެންޑް މޯލްޑިވްސް އަދި ޝަންގްރިއްލާ ވިލިގިލި ރިސޯޓް އެންޑް ސްޕާއެވެ.
ޓޫރިޒަމް މިނިސްޓްރީގައި ބޭއްވި ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ ހަސަން ޟިރާރް ވިދާޅުވީ އެ މިނިސްޓްރީގެ އަމާޒަކީ ރާއްޖޭގައި ފަތުރުވެރިކަމުގެ ހިދުމަތްދޭ ހުރިހާ ރިސޯޓެއް މި ހަރަކާތުގައި ބައިވެރިވެ މުޅި ރާއްޖެ ތަމްސީލްކުރުން ކަމަށެވެ.
މިފަދަ ހަރަކާތެއްގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަށް ގެންދެވޭނެ ކަމަށް އެއްބަސްވުމުގައި ސޮއިކުރި ރިސޯޓުތަކުން ފާހަގަކުރެއެވެ.
މި ހަރަކާތުގައި ބައިވެރިވުމަށް ފަޅާއި ފަރުން ބައެއް ނުވަތަ ބައިތަކެއް ބަޔޮސްފެއަރ ރިޒާވްގެ ކޯއޭރިއާގެ ގޮތުގައި ހެދުމަށް ގިނަ ރިސޯޓް ތަކުން މަސައްކަތްކުރަމުންދާކަން ޓޫރިޒަމް މިނިސްޓްރީން ފާހަގަކުރެއެވެ.
ރާއްޖޭގެ ފަތުރުވެރިކަމަކީ ރަށްތަކުގެ ވަށައިގެންވާ ދުޅަހެޔޮ ފަޅުތަކާއި ފަރުތަކުގެ މައްޗަށް ބަރޯސާވެ ފަތުރުވެރިންނަށް ޚިދުމަތް ދެމުންއަންނަ ސިނާއަތެކެވެ. ބަޔޮސްފެއަރ ރިޒާވްތަކުގެ ސަބަބުން އިތުރު ފުރުޞަތުތައް ހުޅުވި ވަށައިގެންވާ ފަޅުތަކާއި ފަރުތައް ހިމާޔަތްކޮއް ރައްކާތެރި ކުރުމަށް މަގުފަހިވެގެންދާނެ ކަމަށް ޓޫރިޒަމް މިނިސްޓްރީން ދެކެއެވެ.
ބަޔޮސްފިއަރ ރިޒަރވަކީ އެތަނެއްގައި ދެމެހެއްޓެނިވި ގޮތެއްގައި ރޭވިގެން، ތަރައްޤީގެ މަޝްރޫޢުތައް ހިނގާ އަދި ހަމައެޔާއެކު، ދިރޭ ތަކެތީގެ ނަސްލާއި، އެތަކެތީގެ މާޙައުލު ޙިމާޔަތްކޮށް، އިޤްތިޞާދީ ގޮތުން ކުރެވޭ މަސައްކަތްތަކަކީވެސް ދެމެހެއްޓެނިވި އަދި ތިމާވެށްޓާ ރައްޓެހި ގޮތެއްގައި ކުރެވޭ ކަންތައްތަކެއްކަން ޔަޤީންވެފައިވާ، އިޤްތިޞާދީ އަދި އިޖްތިމާޢީ ދުޅަހެޔޮކަމަށް ބާރުއަޅާ ނިޒާމެކެވެ.
ދިވެހިރާއްޖެ ބަޔޮސްފިއަރ ރިޒާވްއަކަށް ހެދުމަށް ސަރުކާރުން މަސައްކަތް ފައްޓަވާފައިވަނީ 2012 ވަނަ އަހަރުއެވެ.