ފްރާންސްގެ ޤައުމީ އެއަރލައިން އެއަރ ފްރާންސްގެ ޝެޑިއުލް ދަތުރުތަށް ޕެރިހާއި ރާއްޖެއާއި ދެމެދު ފަށައިފިއެވެ.
ޕެރިހުން ފުރައިގެން ރާއްޖެއަށް އައި އެއަރ ފްރާންސްގެ ޝެޑިއުލް ފުރަތަމަ ފްލައިޓް ވެލާނާ އިންޓަނޭޝަނަލް އެއަރޕޯޓުގައި ޖެއްސީ މިއަދު ހެނދުނު ދިހަގަނޑި ސާޅީސް ފަހެއްގައެވެ. އެއަރ ފްރާންސްގެ ފްލައިޓަށް ވެލާނާ އިންޓަރނޭޝަނަލް އެއަރޕޯޓުން ވަނީ ހޫނު މަރުހަބާއެއް ކިޔާފައެވެ. ފްލައިޓްގެ ކޮކްޕިޓުން ވަނީ ދިވެހި ދިދައާއި ފްރާންސްގެ ދިދަ ވިހުރާލާފައެވެ.
އެއަރފްރާންސްގެ ދަތުރުތައް ރާއްޖެއަށް ފެށުން ފާހަގަކޮށް ވެލާނާ އިންޓަރނޭޝަނަލް އެއަރޕޯޓްގައި ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވާ ވާހަކަދައްކަވަމުން މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސައީދު ވަނީ އެއަރފްރާންސްގެ ދަތުރުތައް ރާއްޖެއަށް ފެށުމުން ރާއްޖެއަށް އެޤައުމުން އަންނަ ފަތުރުވެރިން އިތުރުވެގެންދާނެ ކަން ފާހަގަކުރައްވާފައެވެ. އަދި ކުރިމަގުގައި ފްރާންސްއާއި އެކު ވިޔަފާރީގެ ގުޅުން އިތުރަށް ބަދަހި ކުރަން ރާއްޖެއިން މަސައްކަތް ކުރާނެކަމަށްވެސް މިނިސްޓަރ ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫއުއާއެކު، އެއަރޕޯޓަށް ބޮޑެތި ބަދަލުތަކެއް އަންނާނެ ކަމަށާއި، އެގޮތުން އަންނަ އަހަރު އޮގަސްޓްމަހުގެ ތެރޭ ވެލާނާ އިންޓަރނޭޝަނަލް އެއަރޕޯޓަށް އެއަރބަސް އޭތްރީ އެއައިޓް ޒީރޯ މަރުކައިގެ ފްލައިޓް ޖެއްސޭނެ ކަމަށް މިނިސްޓަރ ސައީދް ވިދާޅުވިއެވެ.
މި ހަފްލާގައި ވާހަކަދައްކަވަމުން ފްރާންސުން ރާއްޖެއަށާއި ސްރީލަންކާއަށް ކަނޑައަޅުއްވާފައި ހުންނަވާ ސަފީރު، ޖޯން މަރިން ޝުހް ވިދާޅުވީ ރާއްޖެއަކީ ފްރާންސްގެ ފަތުރުވެރިންގެ މެދުގައި މަޤްބޫލް މަންޒިލެއް ކަމަށެވެ. އަދި އެއަރ ފްރާންސްގެ ދަތުރުތަކާއި އެކު އެޤައުމުން ރާއްޖެއަށް އަންނަ ފަތުރުވެރިންނަށް ފަސޭހަވެގެންދާނެކަމަށެވެ. އަދި އެއަރފްރާންސްގެ ދަތުރުތަކާއި އެކު ރާއްޖެއިން ޔޫރަޕަށް މަސް އެކްސްޕޯޓު ކުރުމަށްވެސް ފަސޭހަވެގެންދާނެކަން ވެސް ކަމަށް ސަފީރު ވިދާޅުވިއެވެ.
އެއަރ ފްރާންސުން ރާއްޖެއަށް އުދުހުމަށް ބޭނުންކުރުމަށް ހަމަޖެހިފައިވަނީ، ބޮއިންގ 200-777 މަރުކާގެ، 312 ގޮނޑީގެ މަތިންދާ ބޯޓެކެވެ.