ސަރުކާރުގެ ހަރުދަނާ ސިޔާސަތުތަކާއެކު ރާއްޖެއަށް އިޤްތިސާދީގޮތުން ބޮޑެތި ކުރިއެރުންތަކެއް ލިބެމުންދާ ކަމަށް ބަންޑާރަ ނާއިބް އަލްއުސްތާޛު މުޙައްމަދު އަނިލް ވިދާޅުވެއްޖެއެވެ.
ބަންޑާރަ ނައިބް މިހެން ވިދާޅުވީ އިނގިރޭސިވިލާތުގެ ލަންޑަނުގައި ކުރިއަށްދާ ވޯލްޑް ޓްރެވަލް މާރކެޓުގައި ބައިނަލްއަޤްވާމީ މީޑިއާތަކަށް އަމާޒްކޮށްގެން ރާއްޖޭގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.
ތިން ދުވަހުގެ މުއްދަތަކަށް "އެކްސެލް ލަންޑަން" ކޮންވެންޝަން ސެންޓަރުގައި ކުރިއަށްދާ ވޯލްޑް ޓްރެވަލް މާރކެޓުގައި ބައިވެރިވާ ރާއްޖޭގެ ވަފްދުގެ އެންމެ އިސްބޭފުޅެއްގެ ގޮތުން މިއަހަރު ވަޑައިގަތީ ބަންޑާރަ ނައިބް އަލްއުސްތާޛު މުހައްމަދު އަނިލްއެވެ.
img:http://s1.psmnews.mv/images/660x400/15100602175302.jpg|ބަންޑާރަ ނައިބް މުހައްމަދު އަނިލް ނޫސްވެރިންނަށް މަޢުލޫމާތުދެއްވަނީ-
ބައިނަލްއަޤްވާމީ މީޑިއާތަކަށް ޚާއްސަކޮށްގެން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އަނިލް ވިދާޅުވީ ރާއްޖޭގެ އިޤްތިސާދު ކުރިއެރުވުމަށް އުމްރާނީ ތަރައްޤީގެ މަޝްރޫއުތަކަށް ސަރުކާރުން ޚާއްސަ އިސްކަމެއް ދެއްވާކަމަށެވެ. އެގޮތުން ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫއުގެ މަޢުލޫމާތުތައް އަނިލް ވަނީ ނޫސްވެރިންނާ ޙިއްޞާ ކުރައްވާފައެވެ.
އަނިލްވަނީ ރާއްޖެއަށް ލިބެމުންދާ އިޤްސާދީ ކުރިއެރުންތަކާއެކު ދިވެހިންގެ ޢާއްމު ދިރިއުޅުމަށްވެސް ރަގަޅު ބަދަލުތަކެއް އަންނަމުންދާކަން ފާހަގަކުރައްވާފައެވެ.
ރާއްޖޭގެ ފަރާތުން ބޭއްވި ނޫސްވެރިންގެ ބައްދަލުވުމުގައި ބަންޑާރަ ނާއިބް މުޙައްމަދު އަނިލްގެ އިތުރުން، ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު އަޙުމަދު ޝިއާން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ވައިސް ޗެއަރމަން ހުސެއިން އަފީފް އަދި މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީގެ ޗެއަރމަން މުޙައްމަދު ޚަލީލް ބައިވެރިވެވަޑައިގެންފައިވެއެވެ.