އަންނަ މޭމަހު ބާއްވާ ޓީޓީއެމް ފެއަރއަށް ދުއިސައްތައަށްވުރެ ގިނަ ބައިނަލްއަޤްވާމީ ޓްރެވަލް އޮޕަރޭޓަރުން ގެނައުމަކީ އަމާޒެއް ކަމަށް މި ފެއަރ އިންތިޒާމްކުރާ ކޯރޕަރޭޓް މޯލްޑިވްސްއިން ހާމަކޮށްފިއެވެ.
ލަންޑަންގައި ދާދިފަހުން ބޭއްވި ޑަބްލިއުޓީއެމް ފެއަރގެ ތެރެއިން ޕީއެސްއެމް ނިއުސްއަށް ދެއްވި އިންޓަރވިއުއެއްގައި ކޯރޕަރޭޓް މޯލްޑިވްސްގެ މެނޭޖިންގ ޑިރެކްޓަރ އަޙްމީމް އަބްދުލް ރައްޒާޤް ވިދާޅުވީ ޓްރެވަލް ޓްރޭޑް މޯލްޑިވްސް، ޓީޓީއެމްގައި ޔޫރަޕްގެ ޤައުމުތަކުން ގިނަ އަދަދެއްގެ ޓުއަރ އޮޕަރޭޓަރުން ބައިވެރިވުމަށް ބާރު އެޅުމުގެ ގޮތުން ޔޫރަޕްގެ ޤައުމުތަކުގައި ޓީޓީއެމް އިޝްތިހާރު ކުރުމަށް ޚާއްސަ މަސައްކަތްތަކެެއް ކުރުމަށް ރާވާފައިވާ ކަމަށެވެ.
"އަޅުގަނޑުމެންގެ އަމާޒަކީ ޓީޓީއެމް ފެއަރއަށް ދުއިސައްތައަށްވުރެ ގިނަ ޓްރެވަލް އޮޕަރޭޓަރުން ގެނައުން، ޙާއްސަކޮށް ޔޫރަޕްގެ ގިނަ އަދަދެއްގެ ޓުއަރ އޮޕަރޭޓަރުން ގެނައުމަށް އެކި އެކި ފެއަރތަށް މެދުވެރިކޮށް ޓީޓީއެމް އިޝްތިހާރުކުރުމަށް ވަނީ ރާވާފައި، "އަޙްމީމް ވިދާޅުވިއެވެ.
ޓީޓީއެމް ފެއަރ ބޭއްވުމަށް ހަމަޖެހިފައިވަނީ އަންނަ މޭމަހުގެ އެކަކުން ތިނަކަށެވެ. މިއަހަރުގެ ފެއަރގައި ހޮޓެލިއާ ސަމިޓަކާއި ނެޓްވޯކިންގ ސެޝަންގެ އިތުރުން ގެސްޓްހައުސް އެކްސްޕޯ އަކާއި ޑައިވް އެކްސްޕޯއަކާ ސަޕަލަޔަރ އެކްސްޕޯއެއްވެސް ބޭއްވުމަށް ނިންމާފައިވެއެވެ.
މިއަހަރުގެ ޓީޓީއެމް ފެއަރގައި ދުނިޔޭގެ މަޝްހޫރު ޓްރެވަލް އެޖެންޓުން ބައިވެރިވެފައިވެއެވެ. އޭގެތެރޭގައި އަގޯޑާ، އެކްސްޕީޑިއާ އަދި ބުކިންގ ޑޮޑްކޮމް ފަދަ ފަރާތްތައް ފާހަގަކޮށްލެވެއެވެ.
ދެހާސް ވިހިވަނަ އަހަރު އަންނަ ވާއިރަށް ރާއްޖެއަށް ދެމިލިއަން ފަތުރުވެރިން ގެނައުމަށް އަމާޒް ހިފާފައިވާއިރު، މިފަދަ ފެއަރތަކުގެ ސަބަބުން ރާއްޖެއަށް އަންނަ ފަތުރުވެރިން އިތުރުކުރުމަށް އެހީތެރިވެދޭނެ ކަމަށް މޯލްޑިވްސް ގެޓަވޭސްއިން ބުނެއެވެ.