އަންނަ އާދީއްތަދުވަހު ރައްޔިތުންގެ މަޖިލީހުގެ ޖަލްސާއެއް ބޭއްވުމަށް މަޖިލީހުގެ ރައީސް ނިންމަވައިފިއެވެ.
މަޖިލީހުގެ އިދާރާއިން ބުނީ މަޖިލީހުގެ ޖަލްސާއެއް އަންނަ އާދީއްތަދުވަހު ބޭއްވުމަށް މަޖިލީހުގެ ރައީސް ނިންމެވީ ކޮމިޓީތަކުން ބައެއް ބިލުތައް ނިންމަވަމުން ގެންދެވުމާއެކު، އެބިލުތަކަށް އިސްލާހު ހުށަހެޅުމުގެ ފުރުސަތު މެމްބަރުންނަށް އެރުވުމަށްކަމަށެވެ. ނަމަވެސް މިޖަލްސާއަށް އެޖެންޑާކުރަނީ ކޮން ބިލުތަކެއްކަމެއް މަޖިލީހުގެ އިދާރާއިން ހާމަކޮށްފައެއްނުވެއެވެ.
މަޖިލީހުގެ ޖަލްސާއެއް އާދީއްތަދުވަހު ބޭއްވުމަށް ނިންމާފައިވާއިރު، އާއްމުކޮށް މަޖިލީހުގެ ޖަލްސާތައް އޮންނަނީ ކޮންމެ ހަފްތާއެއްގެ ހޯމަ، އަންގާރަ އަދި ބުދަދުވަހުއެވެ. އަންނަ އާދީއްތަދުވަހު މަޖިލީހުގެ ޖަލްސާއެއް ބޭއްވުމަށްފަހު، ޖެހިގެން އަންނަ ހޯމަދުވަހު މިހިނގާ ސަތާރަވަނަ ރައްޔިތުންގެ މަޖިލީހުގެ އެންމެ ފަހު ޖަލްސާ ބޭއްވުމަށް ނިންމާފައިވާކަން މަޖިލީހުގެ އިދާރާއިން ވަނީ ހާމަކޮށްފައެވެ.