އެމެރިކާއިން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދަށް ބޮޑު ކުރިއެރުމެއް ލިބިއްޖެއެވެ.
މިއަހަރުގެ އޮކްޓޫބަރުމަހުގެ ނިޔަލަށް އެމެރިކާއިން ރާއްޖެއަށް ތިރީސްހާސް ހަތަރުސަތޭކައަށް ވުރެ ގިނަ ފަތުރުވެރިން އައިސްފައިވާއިރު މިއީ ހުސްވި އަހަރުގެ މި މުއްދަތާ އަޅާ ބަލާއިރު %18.3 އިތުރު ޢަދަދެކެވެ.
އެމެރިކާ ހިމެނެނީ ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރާ 10 ޤައުމުގެ ތެރޭގައެވެ.
އަދި މަހުން މަހަށް ބަލާއިރު، ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު ނިސްބަތުން އިތުރުވަމުން އަންނަ ޤައުމުތަކުގެ ތެރޭގައިވެސް އެމެރިކާ ހިމެނެއެވެ.
ހުސްވި އަހަރު އެމެރިކާއިން ރާއްޖެއަށް ތިރީސް ދެ ހާސް ފަސްސަތޭކައަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ ދެހާސް ފަނަރަވަނަ އަހަރާ އަޅާ ބަލާއިރު %11 އިތުރު ޢަދަދެކެވެ.
ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުވަމުން އަންނަ އިރު، ހުސްވި އޮކްޓޫބަރުމަހުގެ ނިޔަލަށް ރާއްޖެއަށް އެއްމިލިއަން ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާ ބަލާއިރު ހަ އިންސައްތަ އިތުރު އަދަދެއްކަން ފާހަގަކޮށްލެވެއެވެ.