ރާއްޖޭގެ ފަތުރުވެރިކަމުގެ ދާއިރާގައި ބޭނުންކުރާ އެނދުގެ އަދަދު 41،000 އަށް އަރައިފިއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިދިޔަ މަހުގެ ނިޔަލަށް ރާއްޖޭގެ ފަތުރުވެރިކަމުގެ ދާއިރާގައި ބޭނުންކުރުމަށް ރަޖިސްޓްރީކޮށްފައިވާ އެނދުގެ އަދަދު ހުރީ 41،069 (ސާޅީސް އެއްހާސް ފަސްދޮޅަސް ނުވައެއް ) ގައެވެ. މިއީ ހުސްވި އަހަރުގެ އެ މުއްދަތާ އަޅާ ބަލާއިރު %11 އިތުރު އަދަދެކެވެ.
ފަތުރުވެރިކަމުގައި ސިނާއަތުގައި މި ވަގުތު 131 ރިސޯޓާއި 13 ހޮޓެލާއި 460 ގެސްޓްހައުސްގެ އިތުރުން 151 ސަފާރީ ރަޖިސްޓްރީކޮށްގެން އަންނަނީ ހިންގަމުންނެވެ. މީގެ ތެރެއިން 28،646 އެނދު ރިސޯޓްތަކުން ފަތުރުވެރިކަމަށް ވަނީ ނެރެފައިއެވެ. 13 ހޮޓެލްގައި ޖުމްލަ 1590 އެނދު ހުރިއިރު ގެސްޓްހައުސްތަކުގައި ޖުމްލަ 7149 އެނދު ވަނީ ފަތުރުވެރިކަމުގެ ސިނާއަތަށް ނެރެފައެވެ. އަދި ސަފާރީތަކުން ފަތުރުވެރިކަމުގެ ސިނާއަތަށް 2776 އެނދު ވަނީ ރަޖިސްޓްރީކޮށްފައެވެ.