ގެއްލުމުގެ ބަދަލު ހޯދައިދޭން ރާއްޖެ މަސައްކަތްކުރާނަން

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހުގެ މުނާސަބަތުގައި މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، ފަލަސްތީނުގައި މިނިވަން ދައުލަތެއް ޤާއިމު ކުރުމަށް ފަލަސްތީނުގެ ސަރުކާރާއި ރައްޔިތުންނަށް ދިވެހިރާއްޖެއިން ކުރަމުން ގެންދާ ތާޢީދު، އެމަނިކުފާނު ވަނީ ތަކުރާރުކުރައްވާފައެވެ. ރައީސުލްޖުމްހޫރިއްޔާ ފާހަގަކުރެއްވިގޮތުގައި، އިޒްރޭލުން ގަދަބާރުން ފަލަސްތީނަށް އަރައިގަނެ، ފަލަސްތީނުގެ ބިންތައް އަތުލާފައިވާތީ، އިޒްރޭލުގެ އަތްދަށުން މިނިވަންކަން ހޯދުމަށް ފަލަސްތީނުން އިޒްރޭލާ ދެކޮޅަށް ކުރަމުންދާ ޖިހާދަކީ އެތައްހާސް ފަލަސްތީނު ރައްޔިތުންގެ އިންސާނީ ޙައްޤުތައް ރައްކާތެރިކުރުމަށް ބައިނަލްއަޤްވާމީ ދުނިޔެ ނުކުޅެދިފައިވާކަމުގެ ހެއްކެއްކަމުގައެވެ.

އެމަނިކުފާނުގެ މެސެޖުގައި، ފަލަސްތީނުގެ މައްސަލައިގައި އޮތް ހަމައެކަނި ޙައްލަކީ 1967 ވަނަ އަހަރުގެ ކުރިން ދުނިޔޭގެ ޗާޓުގައި ފަލަސްތީނުގެ ބޯޑަރު އޮތް ހިސާބަށް ފަލަސްތީނުގެ ބިން އަނބުރާ ހޯދައިދިނުންކަން ފާހަގަކުރައްވައި މިއީ އ.ދގެ ސެކިއުރިޓީ ކައުންސިލުން ވެސް ނިންމާފައިވާ ގޮތްކަމުގައި ވިދާޅުވެފައިވެއެވެ. މިގޮތުން އދ.ގެ ސެކިއުރިޓީ ކައުންސިލްގެ ކަމާބެހޭ ގަރާރުތަކަށާއި އޮސްލޯ އެއްބަސްވުމަށް ފުރިހަމައަށް ބޯލެނބުމަށް އިޒްރޭލަށް އެމަނިކުފާނު ގޮވާލައްވާފައިވެއެވެ.

ރައީސުލްޖުމްހޫރިއްޔާގެ މެސެޖުގައި، ‏ފަލަސްތީން ރައްޔިތުންގެ ޙައްޤުތައް ހޯއްދަވައިދެއްވުމަށް ބައިނަލްއަޤުވާމީ ދުނިޔޭގައި ‏ދިވެހިރާއްޖެއިން ‏އަޑުއުފުއްލަވަމުން ގެންދަވާނެކަމުގައި ވިދާޅުވެފައިވެއެވެ. އަދި، ދިވެހިރާއްޖޭގެ އެންމެހާ ރައްޔިތުން ފަލަސްތީނުގެ ‏އުޚުއްވަތްތެރި ރައްޔިތުންގެ ޙައްޤުގައި ‏ސާބިތުވެ ތިބޭނެކަމުގެ ޔަޤީންކަންވެސް ރައީސުލްޖުމްހޫރިއްޔާ ދެއްވާފައިވެއެވެ. މީގެ އިތުރުން ވެސް ފަލަސްތީނަށް މިކަމުގެ ސަބަބުން ލިބިފައިވާ ގެއްލުމުގެ ބަދަލު ހޯދުމަށާއި އިންސާފު ހޯދުމަށް ބައިނަލްއަޤުވާމީ މައިދާނުގައި ކުރަމުންދާ މަސައްކަތަށް ރާއްޖޭގެ ފުރިހަމަ އެއްބާރުލުން ދެއްވާނެކަމުގައި ވިދާޅުވެފައިވެއެވެ.

އެމަނިކުފާނުގެ މެސެޖުގައި ދާއިމީގޮތަކަށް ހަމަޖެހުން ޤާއިމުކުރެވޭނީ ދެފަރާތުން ވެސް ޞުލްޙަ ޤާއިމުކުރުމަށް މަޝްވަރާތަކެއް ކޮށްގެންކަން ފާހަގަކުރައްވާފައި ވެއެވެ. އަދި، މި މައްސަލަތައް ޙައްލުވުމަކީ ރާއްޖޭގެ ސަރުކާރުން ވަރަށް އުންމީދުކުރާ ކަމެއްކަމުގައިވެސް އެމަނިކުފާނު ވިދާޅުވެފައިވެއެވެ.