އަލަށް އިމާރާތްކުރި އެމްޓީސީސީ ވިލިނގިލީ ފެރީ ޓާމިނަލް "ދާންނާ ގިމަތަ" ހުޅުވާ ޙިދުމަތްދޭން ފަށައިފިއެވެ.
މިއީ ކުރިން ބޭނުންކުރަމުންދިޔަ ވިލިގިލި ފެރީ ޓަރމިނަލް އިތުރަށް ތަރައްޤީކުރުމަށްޓަކައި ވަގުތީގޮތުން ބޭނުންކުރުމަށް ހުޅުވާފައިވާ ޓަރމިނަލެކެވެ.
ކުރިން ޙިދުމަތްދެމުން ދިޔަ ޓާމިނަލްގެ ޕާކިން ޒޯންގެ ގޮތުގައި ބޭނުންކުރެވެމުން އައި ބިމުގައި ތަރައްޤީކޮށްފައިވާ އާ ވިލިގިލި ފެރީ ޓާމިނަލަކީ 240 ފަސެންޖަރުންގެ ޖާގައިގެ ޓާމިނަލެކެވެ. އަދި މި ޓާމިނަލް ފަރުމާކޮށްފައިވާނީ ފަސެންޖަރުންނަށް ވީހާވެސް ވަސޭހަ ވާނެ ގޮތަކަށްކަމަށް އެމްޓިސީސީން ބުނެއެވެ. މި ޓާމިނަލާއެކު ވިލިނގިއްޔާއި މާލެއާ ދެމެދު ދޭ ފެރީ ޙިދުމަތުގައި ބޭނުންކުރާ އުޅަނދުތައްވެސް މަރާމާތު ކުރެވި ފެންވަރު ރަނގަޅު ކުރެވިގެންދާނެކަމަށް އެމްޓީސީސީން ބުނެއެވެ.
މި ޓަރމިނަލް ހުޅުއްވައިދެއްވާ ނޫސްވެރިންނަށް މަޢުލޫމާތުދެއްވަމުން، އެމްޓީސީސީގެ ޓްރާންސްޕޯޓު ޑިވިޝަންގެ ޖެނެރަލް މެނޭޖަރ އިބްރާހިމް ލަޠީފް ވިދާޅުވީ ވިލިނގިލީ ފެރީ ޓާމިނަލްގައި އޮޓޮމެޓިކް ފެއަރ ކަލެކްޝަން ގޭޓްތަކެއް ހަރުކުރެވި ދަތުރު ކާޑުގެ ޙިދުމަތް ދިނުމަށް މިހާރު ތައްޔާރުވަމުންދާކަމަށެވެ.
ވިލިގިލީ އާ ފެރީ ޓަރމިނަލްގެ މަސައްކަތް އަންނަ ކުރީކޮޅު ފެށުމަށް ތައްޔާރުވަމުންދާ ކަމަށާއި ޓަރމިނަލާ ގުޅޭ މަޢުލޫމާތު ކުރިއަށް އޮތްތާގައި މީޑިއާއާ ހިއްސާކުރަމުންދާނެ ކަމަށް ލަތީފް ވިދާޅުވިއެވެ.
މިދިޔަ ނޮވެމްބަރ މަހުގެ ތެރޭގައި އެމްޓީސީސީއިން ވަނީ، ހުޅުމާލޭގައި ދެމުން ގެންދާ އެއަރޕޯޓް ބަހުގައި އޮޓޮމެޓިކް ފެއަރ ކަލެކްޝަން ސިސްޓަމް ހަރުކޮށް ޓެސްޓުކޮށްފައެވެ. އަދި އަނަން ޖެނުއަރީމަހުގެ ތެރޭގައި ދަތުރު ކާޑުގެ ޙިދުމަތް ފުޅާކޮށް، އެކުންފުނިން ދެމުން ގެންދާ ގިނަ ޙިދުމަތްތަކުގައި ދަތުރު ކާޑު ބޭނުންކުރަން ފަށާނެކަމަށްވެސް އެކުންފުނިންބުނެއެވެ.