ޞިއްޙީ ފަރުވާ ދިނުމުގައި ބޭނުންވާ ގައިޑްލައިންތައް ތައްޔާރުކޮށް މިއަހަރުތެރޭގައި އެ ތަންފީޒްކުރަން ފަށާނެކަމަށް މިނިސްޓްރީ އޮފް ހެލްތް އަބްދުﷲ ނާޒިމް އިބްރާހީމް ވިދާޅުވެއްޖެއެވެ. ޕީ.އެސް.އެމް ނިއުސްއަށް ދެއްވި ޚާއްޞަ އިންޓަރވިއުއެއްގައި ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވީ، ސިއްހީ ދާއިރާއާއި ގުޅޭ 50 ގައިޑްލައިނެއް ތައްޔާރުކުރުމުގެ މަސައްކަތް ކުރަމުންދާކަމަށެވެ.
ސިއްޙީ ޚިދުމަތުގެ ފެންވަރު ރަނގަޅުކޮށް، މިދާއިރާ ހަރުދަނާކުރުމަށްޓަކާ ކުރަމުންދާ މަސައްކަތްތަކުގެ ތެރެއިން އެއް ކަމަކީ ބޭސްފަރުވާއަށް ބޭނުންވާ ގައިޑްލައިންތަކެއް ތައްޔާރުކުރުމުގެ މަސައްކަތްކަމަށް ހެލްތް މިނިސްޓްރީން ބުނެއެވެ. ޕީއެސްއެމް ނިއުސްއަށް ދެއްވި އިންޓަރވިއުއެއްގައި ހެލްތް މިނިސްޓަރު ޢަބްދުﷲ ނާޒިމް އިބްރާހީމް ވިދާޅުވީ، ޑަބްލިޔު.އެޗް.އޯގެ އެހީތެރިކަމާއެކު 50 ގައިޑްލައިން ތައްޔާރުކުރުމުގެ މަސައްކަތް މިހާރު ކުރަމުންދާކަމަށެވެ. މިނިސްޓަރ ވިދާޅުވީ، މި ގައިޑްލައިންގެ ސަބަބަބުން ރާއްޖެއިން ދެވޭ ޞިއްޙީ ޚިދުމަތްތަކަކީ ވަކި ފެންވަރެއްގައި ވަކި މިންގަނޑުތަކެއް ހިފެހެއްޓިފައިވާ ޚިދުމަތްތަކަށް ވެގެންދާނެކަމަށެވެ. އަދި މި ގައިޑްލައިންތަކުގެ ސަބަބުން ޞިއްޙީ ޚިދުމަތް ދިނުމުގައި ދިމާވާ މައްސަލަތައް މަދުކުރެވޭނެކަން މިނިސްޓަރ ފާހަގަކުރެއްވިއެވެ.
"ބައްޔެއް ޖެހިގެން އަންނަ މީހަކު އައިޖީއެމްއެޗްއަށް ދިޔައަސް، ބޭސްފަރުވާ ކޮށްދިނުމަށްޓަކައި އޮންނާނެ ވަކި އުސޫލްތަކެއް ލިޔެފައި. އޭގެ ގައިޑްލައިންތައް ބަދެލެއް ނުގެނެސް އަތޮޅުތެރޭގެ ސިއްޙީ މަރުކަޒު އަދި ހޮސްޕިޓަލްތަކަށް ބޭނުންކުރުމަށްޓަކައި ޑޮކްޓަރުންގެ އަތްމަތީ ފޮތެއްގެ ގޮތުގައި ތައްޔާރުކުރާ ގައިޑްލައިނެއް. މިއީ ދުނިޔޭގެ ތަޙްޒީބުވެ ތަރައްޤީވެފައިވާ ސިއްޙީ ނިޒާމްގައި ވަރަށް ބޮޑަށް ބޭނުންކުރާ ސިސްޓަމެއް. މި ގައިޑްލައިންތައް ތައްޔާރުކޮށް ތަންފީޒްކުރުމުގެ މަސައްކަތް މިއަހަރުތެރޭ ކުރަން ފަށާނެ" ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވިއެވެ.
ހެލްތް މިނިސްޓަރ ނާޒިމް ވިދާޅުވީ، މިފަދަ ގައިޑްލައިންތައް އުފެއްދުމުގެ އެންމެ ބޮޑު އެއް މަޤްޞަދަކީ ދެމެހެއްޓެނިވިގޮތެއްގައި އެ ޚިދުމަތް ދިނުންކަމަށެވެ. އަދި ސިއްޙީ ޚިދުމަތްތަކުގެ ފެންވަރު މިނެކިރާ، ކޮލެޓީ ހިފެހެއްޓުމަށްވެސް ފަސޭހަތަކެއް ވެގެންދާނެކަމަށެވެ.
ރާއްޖޭގެ ޞިއްޙީ ދާއިރާ ތަރައްޤީކުރުމަށް ސަރުކާރުން ކުރަމުންދާ މަސައްކަތްތަކުގެތެރެއިން މި އަހަރުވާނީ ބޮޑެތި ކުރިއެރުންތަކާއި، ތަރައްޤީ ޙާޞިލްވަނެ އަހަރަކަށްކަމަށް ހެލްތް މިނިސްޓަރީން ބުނެއެވެ. އެގޮތުން ދަރުމަވަންތަ ހޮސްޕިޓަލުގެ 25 ބުރީގެ ޢިމާރާތާއި، އައްޑޫސިޓީގައި ޢިމާރާތްކުރާ ޓަރޝަރީ ހޮސްޕިޓަލާއި ކުޅުދުއްފުށީ ޓަރޝަރީ ހޮސްޕިޓަލްގެ މަސައްކަތް ނިންމާއި ޚިދުމަތްދޭން ފެށުމާއެކު ޞިއްޙީދާއިރާއަށް އިންޤިލާބީ ބަދަލުތަކެއް އަންނާނެކަމަށް ހެލްތް މިނިސްޓްރީން ބުނެއެވެ.