ޕީޕީއެމް ވަރުގަދަ ކުރުމަށްޓަކައި އެޕާޓީއަށް މެމްބަރުން އިތުރު ކުރުމުގެ މަސައްކަތް ފައްޓަވާފައިވާކަމަށް ޕީޕީއެމްގެ ރައީސް އަދި ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެއެވެ.
ސަތާރަވަނަ ރައްޔިތުންގެ މަޖިލީހުގެ ޕީޕީއެމް މެމްބަރުންނާއި އަށާރަ ވަނަ މަޖިލީހަށް ހޮވިވަޑައިގެންނެވި އެޕާޓީގެ މެމްބަރުންނާ ސީހައުސްގައި ބައްދަލްކުރައްވާ ވާހަކަފުޅު ދައްކަވަމުން ރައީސް މައުމޫން ވިދާޅުވީ، ސަރުކާރު ދެމެހެއްޓުމަށްޓަކައި ޕާޓީ ވަރުގަދަކުރަން ޖެހޭ ކަމަށާއި،އެކަން ކުރެވޭނީ ޕާޓީގެ މެމްބަރުންގެ އަދަދު މިހާރަށް ވުރެ އިތުރުކޮށްގެންކަމަށެވެ.
އެމަނިކުފާނު ވިދާޅުވި ޕާޓީއަށް މެމްބަރުން އިތުރުކުރުމަށްޓަކައި މިހާރު ޓާސްކް ފޯހެއް އެކުލަވާލާފައިވާކަމަށާއި، ބައެއް ރަށްރަށުގައި ޕާޓީއަށް މެމްބަރުން އިތުރުކުރުމުގެ މަސައްކަތް މިހާރު ކުރިއަށްދާކަމަށެވެ.
މައުމޫން ވިދާޅުވީ ޕީޕީއެމަށް ހެޔޮއެދިވަޑައިގަންނަވާ ބޭފުޅުންގެ ބުރަ މަސައްކަތުން ނިމިގެންދިޔަ ރިޔާސީ އިންތިހާބާއި، ރައްޔިތުންގެ މަޖިލީހުގެ އިންތިހާބުގެ އިތުރުން ކައުންސިލް އިންތިހާބުގެ އަޣުލަބިއްޔަތު ވެސް ސަރުކާރަށް ލިބިފައިވާކަމަށެވެ. އެހެންކަމުން ކުރިއަށް ކުރަންހުރި މަސައްކަތްތަކަކީ ޒިންމާ ބޮޑު އަދި ބުރަ މަސައްކަތްތަކެއްކަން ފާހަގަކުރައްވަމުން މައުމޫން ވިދާޅުވީ، ޕީޕީއެމްގެ ސަރުކާރު ދެމެހެއްޓުމަށްޓަކައި ޕާޓީގެ އެންމެހާ މެންބަރުންގެ އެހީތެރިކަން ވަރަށް ބޮޑަށް ބޭނުންވާނެކަމަށެވެ. އެގޮތުން ރައްޔިތުންގެ މަޖިލީހުގެ މެންބަރުންނާއި، ކައުންސިލަރުންނާއި އާންމު މެންބަރުންގެ އެހީތެރިކަން ވެސް ބޭނުންވާނެކަމަށާއި، އެންމެންގެ އެއްބާރުލުން ސަރުކާރަށް ދެއްވުމަށް މައުމޫން އިލްތިމާސްކުރެއްވިއެވެ.