ތުރުކީގައި ބާއްވާ އެންމެ ބޮޑު އެއް ފެއަރ އީސްޓް މެޑިޓްރޭނިއަން އިންޓަރނޭޝަނަލް ޓްރެވަލް އެންޑް ޓޫރިޒަމް އީ.އެމް.އައި.ޓީ.ޓީ އެގްޒިބިޝަންގައި ރާއްޖެއިން ބައިވެރިވެއްޖެއެވެ.
މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރަޕަރޭޝަން އާއި އެކު ފަތުރުވެރިކަމުގެ ސިނާއަތުގައި ހަރަކާތްތެރިވާ ރާއްޖޭގެ އަށް ކުންފުންޏަކުން ފަނަރަ ފަރާތެއް މި ފެއަރގައި ވަނީ ބައިވެރިވެފައެވެ.
ތުރުކީގެ އިސްޓަންބޫލްގައި އަންނަ އާދީއްތަ ދުވަހުގެ ނިޔަލަށް ކުރިއަށްދާ މި ފެއަރގެ ރާއްޖޭގެ ސްޓޭންޑު ފަރުމާކޮށްފައިވަނީ ހަނީމޫން މަންޒިލެއްގެ ގޮތުގައި ރާއްޖެ ސިފަކޮށްދޭ ގޮތަށް ކަމަށް އެމްއެމްޕީއާރުސީން ބުނެއެވެ. މި ފެއަރގެ ރާއްޖެގެ ވަފްގައި އެންމެ އިސްކޮށް ހުރީ އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދެވެ. ފެއަރގެ ތެރެއިން ނޫސްވެރިންނާއި ބައްދަލުކުރުމާއި، ޓުއަރ އޮޕަރޭޓަރުންނާއި ބައްދަލުކޮށް ތުރުކީއިން ރާއްޖެއަށް އަންނަ ފަތުރުވެރިން އިތުރުކުރުމަށް ކުރެވިދާނެ ކަންތައްތަކާއި ގުޅޭގޮތުން މަޝްވަރާކުރާނެއެވެ.
ތުރުކީއަކީ ރާއްޖެއަށް ފަތުރުވެރިން އަންނަ މިންވަރު އިތުރުވަމުން އަންނަ ޤައުމެެކެވެ. އެގޮތުން ހުސްވި އަހަރު އެޤައުމުން ރާއްޖެއަށް 11،168 ފަތުރުވެރިން ޒިޔާރަތްކޮށްފައިވާ އިރު މިއީ 2016 ވަނަ އަހަރާއި އަޅާބަލާއިރު 10.7 އިންސައްތަ އިތުރު އަދަދެކެވެ.