ރާއްޖޭގައި ބާއްވާ ފުރަތަމަ "އިންޓަނޭޝަނަލް ޓްރެވެލް އެންޑް ޓްރޭޑް މަރކެޓް ފެއަރ މިއަހަރުގެ ތެރޭގައި ބާއްވާނެކަން އިޢުލާންކޮށްފިއެވެ. މިކަން އިޢުލާންކުރީ މިމަހުގެ 7 ކުން 11އަށް ޖަރުމަނުގެ ބަރލިންގައި ބޭއްވި އައިޓީބީ ފެއަރގެ ތެރެއިންނެވެ. އިންޓަނޭޝަނަލް މޯލްޑިވްސް ޓްރެވެލް މާކެޓް 2018 ގެ ނަމުގައި ބާއްވާ މި ފެއަރ އޮންނާނީ ޖޫން މަހުގެ 23 އިން 24 އަށް އަދާރަން ސެލެކްޓް ހުދުރަންފުށީގައެވެ.
މި އިވެންޓް އިންތިޒާމްކުރާ އައިއެމްޓީއެމް ޕްރައިވެޓް ލިމިޓެޑުން ބުނީ މި އިވެންޓްގައި ދުނިޔޭގެ 20 ގައުމަކުން 50 ހާއި ގާތްކުރާ ޢަދަދަކަށް އެގްޒިބިޓަރުން ބައިވެރިވާނެކަމަށެވެ. އަދި ރާއްޖޭގެ ފަތުރުވެރިކަމުގައި ޙަރަކާތްތެރިވާ 200 ފަރާތަކަށް ފުރުޞަތު ދޭނެކަމަށެވެ. އަދި އިންޓަނޭޝަނަލް ޓްރެވެލް ފެއަރއެއް ރާއްޖޭގައި ބޭއްވުމުގެ ބޭނުމަކީ ރާއްޖޭގެ ފަތުރުވެރިކަމުގައި ޙަރަކާތްތެރިވާ ރިސޯޓްތަކާއި، ހޮޓެލްތައް އަދި ލިވަބޯޑްތަކާއި، ގެސްޓްހައުސްތަކަށް ހެޔޮ އަގުގައި ދުނިޔޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކާއި ބައްދަލުކޮށްލުމުގެ ފުރުސަތު ހޯދައިދިނުންކަމަށެވެ.
މި ފެއަރގައި ބައިވެރިވުމުގެ ފުރުޞަތު އެޕްރީލްމަހުގެ 6 ގެ ނިޔަލަށް ވަނީ ހުޅުވާލާފައެވެ.