ދައުލަތުގެ ބެލުމުގެ ދަށުގައި ދިރިއުޅޭ ކުދިންނާއެކު މިނިސްޓަރ އޮފް ޖެންޑަރ އެންޑް ފެމެލީ ޒެނީޝާ ޝަހީދު ޒަކީ މިއހަރުގެ ފިޠުރު ޢީދު ދުވަސް ފާހަގަކޮށްފިއެވެ. ވޭތުވެދިޔަ ދެއަހަރުވެސް މިނިސްޓަރ ޒެނީޝާ ޢީދުފާހަގަކުރެއްވީ މިނިސްޓްރީ އޮފް ޖެންޑަރ އެންޑް ފެމިލީގެ ދަށުން ހިންގާ މަރުކަޒުތަކުގައި ބަލަހައްޓަމުންދާ ކުދިންނާއެކުއެވެ.
ފިތުރު ޢީދުގެ މުނާސަބަތުގައި މިނިސްޓްރީން ވަނީ އެނިމޭޓަޑް ކާރޓޫން ފިލްމު "ސިންގް" ގެ ޚާއްޞަ ޝޯއެއް އޮލިމްޕަހުގައި މިއަދު ހެނދުނު އިންތިޒާމުކޮށްފައެވެ. އަދި، ފިޔަވަތީގައި ދިރިއުޅޭ އުމުރުން 4 އަހަރުން މަތީގެ 72 ކުދިންނާއެކު މިނިސްޓަރ ޒެނީޝާ މި ހަރަކާތުގައި ބައިވެރިވެވަޑައިގެންނެވިއެވެ. މި ހަރަކާތުގައި ކުދިންގެ އިތުރުން ފިޔަވަތީގައި މަސައްކަތްކުރާ މުވައްޒަފުންނާއި، މިނިސްޓްރީގެ ބައެއް މުވައްޒަފުންނާއި މުވައްޒަފުންގެ ޢާއިލާތަކުން ވެސް ބައިވެރިވިއެވެ.
މި ހަރަކާތް އިންތިޒާމުކޮށްފައިވަނީ ޕީއެސްއެމްއާއި އެޗް.ޑީ.ސީއާއި އެމް.އެން.ޑީ.އެފް އަދި އެމް.ޓީ.ސީ.ސީގެ އެހީތެރިކަމާއެކުގައެވެ. ފިޠުރު ޢީދާ ގުޅުވައިގެން ޢީދު ބަންދުގެ ތެރޭގައި ކުޑަކުދިންގެ ހިޔާގެ ކުދިންނަށް ވެސް ޚާއްޞަ ހަރަކާތްތަކެއް މިނިސްޓްރީން ވަނީ އިންތިޒާމުކޮށްފައެވެ. މި ގޮތުން، ޢީދު ދުވަހުގެ ތަފާތު ކުޅިވަރުތަކުގެ އިތުރުން، ޕިކްނިކް ދަތުރެއް ހަމަޖައްސާފައިވާއިރު މިއިން ބައެއް ހަރަކާތްތަކުގައި މިނިސްތާރ ބައިވެރވުމަށް ހަމަޖެހިފައިވެއެވެ.
ތަފާތު ސަބަބުތަކާ ގުޅިގެން ދަޢުލަތުގެ ބެލުމުގެ ދަށުގައި މަރުކަޒުތަކުގައި މިވަގުތު ޖުމްލަ 136 ކުދިން ދަނީ ބަލަހައްޓަމުންނެވެ. މި ގޮތުން، ފިޔަވަތި މަރުކަޒުގައި 13 އަހަރުން ދަށުގެ 87 ކުދިނާއި ކުޑަކުދިންގެ ހިޔާ އަދި އަމާން ހިޔާގައި 13 އަހަރާއި 18 އަހަރާއި ދެމެދުގެ 49 ކުދިން މި ވަގުތު ދަނީ ދިރިއުޅެމުންނެވެ.