އަންނަ ސެޕްޓެމްބަރު މަހުގެ ދަރުމަވަންތަ ހޮސްޕިޓަލްގެ މަސައްކަތް ނިންމާ ޚިދުމަތްދޭން ފެށޭވަރުވާނެކަމަށް ހެލްތް މިނިސްޓަރ އަބްދުﷲ ނާޒިމް ވިދާޅުވެއްޖެއެވެ. ދަރުމަވަންތަ ހޮސްޕިޓަލްގެ މަސައްކަތް ކުރިޔަށްދާގޮތް ބައްލަވާލެއްވުމަށް އެ ހޮސްޕިޓަލަށް ކުރެއްވި ޒިޔާރަތަށް ފަހު މިނިސްޓަރ ނާޒިމް ވިދާޅުވީ ސެޕްޓެމްބަރުމަހު ހޮސްޕިޓަލުން ބައެއް ހިދުމަތްތަށް ދޭން ފެށުމަށް މަސައްކަތް ކުރައްވަމުންދާކަމަށެވެ.
ދަރުމަވަންތަ ހޮސްޕިޓަލްގެ މަސައްކަތް ނިންމާ ޙިދުމަތްދޭން ފެށުމުން، ރާއްޖޭގެ ޞިއްޙީ ދާއިރާއަށް މިހާރު ކުރިމަތިވެފައިވާ ދަތިތައް ޙައްލުވެ، އެދާއިރާއަށް ބޮޑު އިންޤިލާބެއް އަންނާނެކަމަށް ސަރުކާރުން ޤަބޫލްކުރެއެވެ. އަދި ހޮސްޕިޓަލާއެކު ސަރުކާރުން ވެރިރަށް މާލޭގައި ދޭ ޞިއްޙީ ޚިދުމަތްތައް ބޮޑެތި ކުރިއެރުންތައް އަންނާނެކަމަށް އައި.ޖީ.އެމް.އެޗުން ބުނެއެވެ. އެގޮތުން އެ ހޮސްޕިޓަލުން ދެމުން އަންނަ ފިޒިއޮތެރަޕީގެ ޚިދުމަތް އިތުރަށް ތަރައްޤީވެގެންދާނެއެވެ. ހަމައެހެންމެ ސްޕޯޓްސް މެޑިސިންގެ ޚިދުމަތާއި، ރޭޑިއޮލޮޖީގެ ޚިދުމަތްވެސް އިތުރަށް ތަރައްޤީވެގެންދާނެކަމަށް އައި.ޖީ.އެމް.އެޗުން ބުނެއެވެ. 25 ބުރީގެ މި ހޮސްޕިޓަލާއެކު އައި.ޖީ.އެމް.އެޗްގެ ބެޑް ކެޕޭސިޓީ 500 އަށް އިތުރުވެގެންދާއިރު، މިތަން ވެގެންދާނީ މުޅި ދެކުނު އޭޝިއާ ސަރަޙައްދުގައިވެސް އެންމެ ފާހަގަކޮށްލެވޭ އެއް ހޮސްޕިޓަލަށެވެ.
ދަރުމަވަންތަ ހޮސްޕިޓަލްގެ މަސައްކަތް ކުރިއަށްދާގޮތް ބައްލަވާލެއްވުމަށް ހެލްތް މިނިސްޓަރ އަބްދުﷲ ނާޒިމް އިބްރާހީމް ވަނީ އެ ހޮސްޕިޓަލަށް ޒިޔާރަތްކުރައްވާފައެވެ. މި ޒިޔާރަތަށް ފަހު ނޫސްވެރިންނާއި ވާހަކަދައްކަވަމުން މިިނިސްޓަރ ނާޒިމް ވިދާޅުވީ އަންނަ ސެޕްޓެމްބަރު މަހު ދަރުމަވަންތަ ހޮސްޕިޓަލްގެ ބައެއް ފްލޯތަކުގެ މަސައްކަތް ނިންމާ ޚިދުމަތްދިނުމަށް މަސައްކަތްކުރަމުންދާކަމަށެވެ.
މިނިސްޓަރ ވިދާޅުވީ ކުރިން ޖުލައި 26 ގައި ޚިދުމަތް ފެށުމަށް ނިންމި ނަމަވެސް އެ ކަން ލަސްވެގެންދިޔައީ ބޭނުންވާ ބައެއް މެޝިނަރީޒް ގެނައުމުގައި ބައެއް ދަތިތައް ދިމާވުމުންކަމަށް މިނިސްޓަރ ނާޒިމް ވިދާޅުވިއެވެ.
ދަރުމަވަންތަ ހޮސްޕިޓަލްގެ މަސައްކަތް އެއްކޮށް ނިންމާ ރަސްމީކޮށް ހުޅުވާނެ ދުވަހެއް ސަރުކާރުން ނިންމަވާފައިނުވާކަމަށާއި އެހެންނަމަވެސް އެ ހޮސްޕިޓަލް ނިންމުމަށް ކުރަންޖެހޭ ހުރިހާ މަސައްކަތްތައް ހުއްޓުމެއްނެތި ކުރަމުންދާކަން މިނިސްޓަރ ފާހަގަކުރެއްވިއެވެ. ރާއްޖެއަކީ ފަތުރުވެރިކަމަށް ބަރޯސާވާ ޤައުމަކަށްވުމާއެކު ރާއްޖެ އަންނަ އެކި ފެންވަރުގެ ފަތުރުވެރިންނާއި ޤައުމުތަކުގެ އިސްވެރިންނަށް މި ހޮސްޕިޓަލުން ރަނގަޅު ޚިދުމަތްތަކެއް ލިބިގެންދާނެކަންވެސް މިނިސްޓަރ ވިދާޅުވިއެވެ.
"25 ބުރީގެ ދަރުމަވަންތަ ހޮސްޕިޓަލް އެޅުމަށް ސަރުކާރުން ނިންމެވީ އައިޖީއެމްއެޗްގެ ތޮއްޖެހުން ކުޑަކޮށް ތޮއްޖެހުމުގެ ސަބަބުން ޚިދުމަތް ނުލިބި ގިނަ ވަގުތު ކިއުގައި ތިބުން ކުޑަކުރުމަށް. ރާއްޖެއިން މިހާރު ލިބޭ ޚިދުމަތްތަކުގެ އިތުރުން އާ ޚިދުމަތްތަކެއްވެސް ލިބިގެންދާނެ. ހޮސްޕިޓަލަށް ބޭނުންވާ މެޝިނަރީތައް އައުމުގެ މަގުމަތީގައި އުޅެނީ. "ނާޒިމް ވިދާޅުވިއެވެ.
ދަރުމަވަންތަ ހޮސްޕިޓަލްގައި މިހާރު ކުރަމުންދަނީ އެތަނަށް ބޭނުންވާ މެޝިނަރީސްތައް ހަރުކުރުމުގެ މަސައްކަތްތަކެވެ. ދަރުމަވަންތަ ހޮސްޕިޓަލް ނިމުމުން މި ސަރަހައްދުގެ ޤައުމުތަކަށް ދިވެހިން ބޭސްފަރުވާއަށް ދާ ދިއުން ނިމުމަކަށް އަންނާނެކަމަށް ސަރުކާރުން ބުނެއެވެ.