މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓާޒް، މަޓާޓޯގެ މިއަހަރުގެ އަހަރީ ޢާއްމު ޖަލްސާ އަންނަ މަހު ބާއްވާ ގޮތަށް ހަމަޖައްސައިފިއެވެ.
މަޓާޓޯގެ އަހަރީ ޢާއްމު ޖަލްސާ ބާއްވާނެ ވަކި ތާރީޚެއް ހާމަކޮށްފައިނުވި ނަމަވެސް، އަންނަ ނޮވެމްބަރު މަހުގެ މެދެއްހާތާނގައި އަހަރީ ޢާއްމު ޖަލްސާ ބޭއްވުމަށް މަސައްކަތް ކުރަމުންދާކަމަށް އެ އެސޯސިއޭޝަނުން މަޢުލޫމާތުދެއެވެ. މަޓާޓޯގެ މިއަހަރުގެ އަހަރީ ޢާއްމު ޖަލްސާގައި، އެ އެސޯސިއޭޝަނުގެ ކުރިއަށް އޮތް 2 އަހަރަށް ކަނޑައަޅާ އައު އެގްޒެކެޓިވް ބޯޑު އިޢުލާންކުރުން އޮންނާނެއެވެ.
މަޓާޓޯގެ އައު އެގްޒެކެޓިވް ބޯޑަށް މެންބަރުން ނޮމިނޭޓްކުރުމުގެ ފުރުޞަތު މިމަހުގެ 31 ނިޔަލަށް ހުޅުވާލާފައިވާއިރު، ކެންޑިޑޭޓުންގެ ނަންތައް، ނަތީޖާ ފާޅުކުރުމުގެ ފަނަރަ ދުވަސްކުރިން އިޢުލާންކުރާއިރު، މި ކެންޑިޑޭޓުންނަށް ވޯޓުލެވޭނީ މަޓާޓޯގެ މެމްބަރުންނަށް އެކަނިކަމަށް އެ އެސޯސިއޭޝަނުން ބުނެއެވެ. މަޓާޓޯގެ އެގްޒެކެޓިވް ބޯޑަށް ޖުމްލަ 9 ފަރާތެއް އިންތިޚާބުކުރުމަށް ވަނީ ހަމަޖެހިފައެވެ.
މަޓާޓޯއިން އައުބޯޑު އެކުލަވާލުމުގެ މަސައްކަތް ފަށާފައިވާއިރު މިހާރުގެ އެގްޒެކެޓިވް ބޯޑުގެ ރައީސަކީ އިނަރ މޯލްޑިވްސް ރިސޯޓްގެ އަބްދުﷲ ރިޔާޒެވެ. އަދި ނައިބު ރައީސުންނަކީ ޓްރޮޕިކަލް ކަލެކްޝަންސްގެ އަބްދުﷲ ސުއޫދާއި، ޔޮޓް ޓުއަރސް މޯލްޑިވްސްގެ އިބްރާހިމް ޝިހާމެވެ.
މަޓާޓޯއަކީ ދިވެހިރާއްޖޭގެ ފަތުރުވެރިކަމުގެ ދާއިރާ ދުނިޔޭގެ މައިދާނުގައި އިޝްތިހާރުކުރުމުގެ މަޤްޞަދުގައި 2006 ވަނަ އުފައްދާފައިވާ ޖަމްޢިއްޔާއެކެވެ.