ސަން ސިޔާމް ރިސޯޓްސްއިން ދ. އަތޮޅުގައި ތަރައްޤީކުރާ "ސަން އަކުވާ އިރުވެލި ރިސޯޓް" އަންނަމަހު ހުޅުވުމަށް ތައްޔާރުވެއްޖެއެވެ.
ދ. އަލުވިފުށީގައި ތަރައްޤީކޮށްފައިވާ މި ރިސޯޓަކީ 5 ތަރީގެ ރިސޯޓެކެވެ. މިތަން ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި، މުއްސަނދިކަން އޭގެ އެންމެ ފުރިހަމަ ގޮތުގައި ދައްކުވައިދޭނެ ފަދަ ކޮންސެޕްޓަކަށެވެ. އެގޮތުން މި ރިސޯޓުގައި އޯވަރވޯޓަރ އަދި ބީޗް ފްރަންޓް ވިލާތައް ހިމެނޭހެން ޖުމްލަ 125 ވިލާ ހަދާފައިވާއިރު، މިއިން ކޮންމެ ވިލާއެއްވެސް ފަރުމާކޮށްފައިވަނީ ޕްރައިވެޓް ޕޫލެއް ހިމެނޭހެންނެވެ. މި ރިސޯޓް އަންނަމަހު ހުޅުވުމަށް ތައްޔާރުވަމުންދާއިރު، ބުކިން ހަދަން ބޭނުންވާ ފަރާތްތަކަށް މިހާރުވަނީ އެފުރުޞަތުވެސް ހުޅުވާލާފައެވެ.
ފަތުރުވެރިންނަށް ބޭނުންވާ ގިނަ ޚިދުމަތްތަކެއް ލިބޭނެހެން ތަރައްޤީކޮށްފައިވާ މި ރިސޯޓުގައި އިންފިނިޓީ ޕޫލަކާއި، ފުލީ-އިކުއިޕްޓް ރެކްރިއޭޝަނަލް ސެންޓަރެއްގެ އިތުރުން، ސްޕާ ޓްރީޓްމަންޓްތަކަށް ޙާއްސަ 6 ޕެވީލިއަންވެސް ވަނީ ހަދާފައެވެ. މީގެއިތުރުން ޖެޓްސްކީ ދުއްވުމާއި، ވިންޑް ސަރފިން އާއި ކެތަމަރާން ސެއިލިންގ ފަދަ ވޯޓަރ-ސްޕޯޓްސް ހަރަކާތްތަކަށްވެސް ޚާއްސަ އިންތިޒާމްތައް މި ރިސޯޓުގައި ހަމަޖައްސާފައިވެއެވެ.
މިއީ ސަން ސިޔާމް ރިސޯޓްސް އިން "ސަން އަކުވާ" މި ބްރޭންޑްގެ ދަށުން ހުޅުވާ 3 ވަނަ ރިސޯޓެވެ. އެގޮތުން އެކުންފުނިން މިހާރުވެސް އަންނަނީ ދ. އަތޮޅުގައި "ސަން އަކުވާ ވިލު ރީފް" ގެ ނަމުގައި އިތުރު ރިސޯޓެއް ހިންގަމުންނެވެ. އަދި ހަމަ މި ބްރޭންޑްގެ ދަށުން އަވަށްޓެރި ސްރިލަންކާގައިވެސް "ސަން އަކުވާ ޕަސިކުޑަ" ގެ ނަމުގައި ރިސޯޓެއް ހިންގަމުންދެއެވެ.
މި 3 ރިސޯޓުގެ އިތުރުން، ސަން ސިޔާމް އިރު ފުށި މޯލްޑިވްސް އާއި އޮޅުވެލި ބީޗް އެންޑް ސްޕާ މޯލްޑިވްސްއަކީވެސް ސަން ސިޔާމް ރިސޯޓްސްއިން ރާއްޖޭގައި ހިންގަމުން އަންނަ 2 ރިސޯޓެވެ.