މޫވެންޕިކް ހޮޓެލްސް އެންޑް ރިސޯޓްސްއިން ނ. އަތޮޅުގައި ތަރައްޤީކުރި ކުރެދިވަރު ރިސޯޓު ހުޅުވައިފިއެވެ.
5 ތަރީގެ މި ރިސޯޓު ރަސްމީކޮށް ހުޅުވާ، ޚިދުމަތްދޭން ފެށީ މިމަހުގެ 1 ވަނަ ދުވަހެވެ. މިއީ މޫވެންޕިކުން ރާއްޖޭގައި ހުޅުވި ފުރަތަމަ ރިސޯޓުވެސްމެއެވެ. މި ރިސޯޓްގައި 72 އޯވަރވޯޓަރ ޕޫލް ވިލާއާއި، 33 ބީޗް ޕޫލް ވިލާ ހުރެއެވެ. އަދި ފަތުރުވެރިންނަށް ޚިދުމަތްދިނުމަށްޓަކައި ތަފާތު ރަހަތަކަށް ޚާއްޞަކޮށްގެން ހަދާފައިވާ 4 ރެސްޓޯރަންޓް ހުރެއެވެ.
"މޫވެންޕިކް ރިސޯޓް ކުރެދިވަރު މޯލްޑިވްސް"އަށް ވެލާނާ އިންޓަނޭޝަނަލް އެއަރޕޯޓުން 45 މިނެޓުގެ ތެރޭގައި ދެވޭނެއެވެ. މި ރިސޯޓް ހުޅުވާފައިވަނީ ފަތުރުވެރިންނަށް ބޭނުންވާނެ ރެކްރިއޭޝަނަލް ގިނަ ޚިދުމަތްތަކަކާއެކުއެވެ. އެގޮތުން ޑައިވިން ސެންޓަރުތަކާއި، ވޯޓަރ ސްޕޯރޓްސް ސެންޓަރުތައް މި ރިސޯޓުގައި ވަނީ ޤާއިމުކޮށްފައެވެ.
މޫވެންޕިކް ހޮޓެލްސް އެންޑް ރިސޯޓްސްއިން ކުރެދިވަރު ތަރައްޤީކުރުމުގެ އެއްބަސްވުމުގައި ސޮއިކޮށްފައިވަނީ 2017 ވަނަ އަހަރުގެ އޭޕްރީލް މަހުގެ ތެރޭގައެވެ.
ސުވިޓްޒަލެންޓްގެ މޫވެންޕިކް ހޮޓެލްސް އެންޑް ރިސޯޓްސް އުފެދިފައިވަނީ 1973 ވަނަ އަހަރުގެ ތެރޭގައެވެ. އެ ކުންފުނިން އެފްރިކާ، އޭޝިޔާ، މެދުއިރުމަތި އަދި ޔޫރަޕް ޞަރަޙައްދުގައި މިހާރުވެސް 82 ހޮޓެލް އަންނަނީ ހިންގަމުންނެވެ. އަހަރެއްގެ މައްޗަށް 5.8 މިލިއަން ފަތުރުވެރިންނަށް ޚިދްމަތްދެމުން އަންނަ މި ކުންފުނިން މިހާރުވެސް ދަނީ އޭޝިއާއާއި މެދުއިރުމަތީގެ ޤައުމުތަކުގައި 30 ރިސޯޓެއް ތަރައްޤީކުރަމުންނެވެ. ޢަމާޒަކީ 2020 ވަނަ އަހަރު އައުމުގެ ކުރިން މިޢަދަދު 125 އިތުރުކުރުންކަމަށް އެ ކުންފުނިން ބުނެއެވެ.