ދުނިޔޭގެ ފުރަތަމަ ކަނޑުއަޑީގެ ވިލާ ކޮންރަޑް މޯލްޑިވްސް ރަންގަލި އައިލެންޑް ރިސޯޓުގައި ހުޅުވައިފި

ދުނިޔޭގެ ފުރަތަމަ އަންޑަވޯޓަރ ވިލާ ނުވަތަ ކަނޑުއަޑީގެ ވިލާ ކޮންރަޑް މޯލްޑިވްސް ރަންގަލި އައިލެންޑް ރިސޯޓުގައި ހުޅުވައިފިއެވެ.

"މުރަކަ"ގެ ނަމުން ނަންދީފައިވާ މި ވިލާ ފަރުމާކޮށްފައިވަނީ 2 ފަންގިފިލައަށެވެ. އެގޮތުން މޫދުގެ މަތިން އެއް ފަންގިފިލާ ފެންނަން ހުންނައިރު، އަނެއް ފަންގިފިލާ ހުންނާނީ ކަނޑުގެ 5 މީޓަރު އަޑީގަކަމަށް ކޮންރަޑް މޯލްޑިވްސް ރަންގަލި އައިލެންޑް ރިސޯޓުން ބުނެއެވެ . މިމަހުގެ އެއްވަނަ ދުވަހު މުރަކަ ރަސްމީކޮށް ހުޅުވާފައިވާއިރު، މިހާރުވެސް ފަތުރުވެރިން ބުކިން ހަދާފައިވާކަމަށް އެ ރިސޯޓުން ވަނީ ޕީ.އެސް.އެމަށް މަޢުލޫމާތުދީފައެވެ.

ކޮންރަޑް މޯލްޑިވްސް ރަންގަލި އައިލެންޑް ރިސޯޓުގަ އެންމެ ރެއެއް ހޭދަކޮށްލުމަށްވެސް 50 ހާސް ޑޮލަރު ދައްކަންޖެހެއެވެ. މި ވިލާގެ އިންޓީރިއަރ ޑިޒައިންކޮށްފައިވަނީ ރަންގަލި އައިލެންޑް ރިސޯޓު ހިންގާ މައި ކުންފުނި ،ކްރައުން ކޮމްޕެނީގެ އާކިޓެކްޗަރުންނެވެ. އަދި މި ވިލާ ހަދާފައިވަނީ އެކުއޭރިއަމް ޓެކްނޮލޮޖީއަށް ޚާއްޞަ ނިއުޒިލޭންޑުގެ މަޝްހޫރު ކުންފުންޏެއްކަމަށްވާ އެމް.ޖޭ މާރފީ ލިމިޓެޑުންނެވެ.

ގާތްގަނޑަކަށް 15 މިލިއަން ޑޮލަރު ޙަރުދުކޮށްގެން ހަދާފައިވާ މި ވިލާގައި ބެޑްރޫމަކާއި، ލިވިންގ އޭރިޔާއެއްގެ އިތުރުން ޖިމަކާއި، ޑައިނިން ރޫމްއަކާއި، ޕޫލްއެއްވެސް ވަނީ ހިމަނާފައެވެ. އަދި މިތަނުގެ އެންމެ ހިތްގައިމުކަމަކީ، ކަނޑުއަޑީގެ ގުދުރަތީ މުއްސަނދިކަމުގެ އިތުރަށް އިރުއަރާ މަންޒަރާއި، އިރުއޮއްސޭ މަންޒަރުވެސް ރީތިކޮށް ފެނުމެވެ. މިއީ ކަނޑުއަޑީގެ މަންޒަރުތައް ބަލާ ތަޖުރިބާކޮށްލަން ބޭނުންވާ ފަތުރުވެރިންނަށް ލިބިގެންދާ ރަނުގެ ފުރުޞަތެއްކަމަށް އެ ރިސޯޓުން ބުނެއެވެ.

5 ތަރީގެ ކޮންރަޑް މޯލްޑިވްސް ރަންގަލި އައިލެންޑް ރިސޯޓުގައި މީގެ 13 އަހަރު ކުރިންވަނީ ކަނޑުގެ 4.9 މީޓަރުއަޑީގައި ރެސްޓޯރެންޓެއްވެސް ހަދާފައެވެ. ފަތުރުވެރިންގެ ފަރާތުން މިތަނަށްވެސް އަންނަނީ ބޮޑު ތަރުހީބެއް ލިބެމުންނެވެ.