ރާއްޖޭގެ 17 މިސްކިތެއްގައި ޤުރުއާން ކިޔަވައިދިނުމުގެ މަޝްރޫޢު ރަސްމީކޮށް އިފްތިތާޙްކޮށްފިއެވެ.
މި ޕްރޮގްރާމް އިފްތިތާހްކޮށްދެއްވީ މާފުށީގައިހުންނަ މަސްޖިދު އަލް ފާރޫޤް މިސްކިތުގައި، ރައީސުލް ޖުމްހޫރިއްޔާގެ ނާއިބް ފައިސަލް ނަސީމްއެވެ.
މި މަޝްރޫޢުގެ ދަށުން ރާއްޖޭގެ 11 އަތޮޅެއްގެ 17 މިސްކިތެއްގައި ޤުރުއާން ކިޔަވައިދިނުމަށް ވަނީ ހަމަޖެހިފައެވެ. މި މަޝްރޫޢުގައި މިހާތަނަށް 300 ދަރިވަރުން ބައިވެރިވެފައިވާކަމަށް އިސްލާމިކް މިނިސްޓްރީން ބުނެއެވެ. ކީރިތި ޤުރުއާނަށާއި މިސްކިތްތަކަށް، ކުޑަކުދިންގެ ހިތުގައި އޮންނަ ލޯބި އިތުރުކުރުމަށް ކުރިއަށްގެންދާ މި މަޝްރޫޢު ކުރިއަށްއޮތްތާގައި ރާއްޖޭގެ ހުރިހާ މިސްކިތެއްގައި ކުރިއަށްގެންދިޔުމަށް މަސައްކަތް ކުރަމުންދާކަމަށް އިސްލާމިކް މިނިސްޓްރީން ބުނެއެވެ.
މި މަޝްރޫޢު އިފްތިތާޙްކޮށްދެއްވުމަށްފަހު ވާހަކަފުޅުދައްކަވަމުން ނާއިބު ރައީސް ފައިޞަލް ނަސީމް ވިދާޅުވީ މި ސަރުކާރުގެ އެންމެ ބޮޑު އެއް އަމާޒަކީ ރާއްޖޭގެ ރަށްޔިތުންގެ މެދުގައި އިސްލާމްދީން އަލާކޮށް ދިރުވުންކަމަށެވެ. އެގޮތުން މި މަޝްރޫއަކީ މިކަން ކުރުމަށް ފެށި މުހިއްމު މަސައްކަތްތަކެއްކަން ފާހަކުރައްވާ، ނައިބްރައީސް ވިދާޅުވީ މިކަން ކުރިއަށްގެންދެވޭނީ ފަރުވާކުޑަނުކޮށް ދަރިން މިސްކިތްތަކަށް ފޮނުވާ އުނގަންނައިދީގެންކަމަށެވެ. އަދި ރާއްޖޭގެ ތަރައްޤީއަށްވެސް ބޭނުންވަނީ އިސްލާމްދީނަށް ކަމޭހިތާ ދަރިންތަކެއްކަމަށްވެސް ނައިބްރައީސް ފައިޞަލް ނަސީމް ވިދާޅުވިއެވެ.
މި ރަސްމިއްޔާތުގައި ވާހަކަުޅުދައްކަވަމުން އިސްލާމިކް މިނިސްޓަރ ޑރ.އަޙްމަދު ޒާހިރު ވިދާޅުވީ މި މަޝްރޫއަކީ އެދުރުގެތަކުގައި އަދާކުރަމުންދިޔަ ދައުރު މިސްކިތްތަކަށް ބަދަލުކޮށް ދަރިންގެ ހިތްތަކުގައި ދީނާމެދު އޮންނަ ލޯބި އިތުރުކުރުމަށް ކުރިއަށްގެންދާ މަޝްރޫއެއްކަމަށާއި މިއީ މި ސަރުކާރުން ވަރަށް ބޮޑު އިސްކަމެއް ދީގެން ކުރިއަށްގެންދާ މަޝްރޫއެއްކަމަށެވެ. އަދި މިކަމުގެ ސަބަބުން މުޅި މުޖުތަމަޢުއަށް ފައިދާތަކެއް ކުރާނެކަމަށްވެސް މިނިސްޓަރ ވިދާޅުވިއެވެ.
މިސްކިތްތަކުގައި ޤުރުއާން ކިޔަވައިދިނުމުގެ ޕްރޮގްރާމް އިފްތިތާހްކުރުމުގެ ރަސްމިއްޔާތުގައި ވާހަކަފުޅުދައްކަވަމުން ހޯމް މިނސްޓަރ އައްޝައިޚް އިމްރާން ޢަބްދުﷲ ވިދާޅުވީ ޅަފަތުގައި ކީރިތި ޤުރުއާނާއި މިސްކިތްތަކަށް ކުރާ ލޯބި ދަރިންގެ ހިތުގައި އިތުރުކޮށް ރަނގަޅު ތަރުބިއްޔަތެއް ދެވިއްޖެނަމަ ރާއްޖެއިން މިއަދު ފެންނަމުންދާ ކުށްތައް މަދުވެގެންދާނެކަމަށެވެ. އަދި މި ފަދަ މަޝްރޫއެއް ފެށުމަކީ މި ބިމުގައި ފަށާ އެންމެ ހެޔޮ މަސައްކަތްކަމަށްވެސް މިނިސްޓަރ އިމްރާން ވިދާޅުވިއެވެ.
މި މަޝްރޫޢު ކުރިއަށްގެންދިޔުމަށް ހަމަޖެހިފައިވަނީ ތިން ބަޔަކަށް ބަހާލައިގެންނެވެ. އެއީ އަކުރު ދަސްކުރުމާއި، ހިތުން ކިޔެވުމާއި، ބަލައިގެން ކިޔެވުމަށް ދަސްކޮށްދޭ ކްލާސްތަކެވެ. މިސްކިތްތަކުގައި ޤުރުއާން ކްލާސްތައް ކުރިއަށްގެންދިޔުމަށް ހަމަޖެހިފައިވަނީ ދެ ދަންފަޅިއަކަށް ބަހާލައިގެންނެވެ.
މިސްކިތްތަކުގައި ޤްރުއާން ކިޔަވައިދޭން ފެށުމަކީ މި ސަރުކާރުގެ ފުރަތަމަ 100 ދުވަހުގެ ތެރޭގައި ކުރުމަށް ކަނޑައަޅާފައިވާ ކަމެކެވެ.