މާލޭގެ މަގުތަކުގެ ކުރެހުންތަކުގެ ކުލަ ބަދަލުކޮށް، ދަވާދު ފޮހެވިފައި ހުރި ސްޕީޑް ބްރޭކަރުތަކާއި ކަފިހި ހުރަސްތަކުގައި ދަވާދު އައު ކުރުމުގެ މަސައްކަތް ފަށައިފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން މާލެ ސިޓީގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ މާލޭގެ މަގުތަކުގައި ކުރަހާފައިވާ ނިޝާންތަކުގެ ކުލަ އާކުރުމުގެ މަސައްކަތް ފަށާފައިވާކަމަށާއި، ހުރިހާ މަގުތަކުގައި ކުރަހާފައިވާ ނިޝާންތައް އާކޮށް، ގެންނަންޖެހޭ ބަދަލުތައް ގެނައުމަށް ނިންމާފައިވާކަމަށެވެ.
އެގޮތުން ކުރީގެ ސަރުކާރުން މާލޭގެ މަގުތަކުގައި ކުރަހާފައިވާ ނިޝާންތައް ހުދުކުލައަށް ބަދަލުކުރިނަމަވެސް، ސިޓީ ކައުންސިލުން އަލަށް ކުރަހަމުންދާ ނިޝާންތަކުގައި ލަނީ ރީނދޫކުލައެވެ. މާލެ ސިޓީގެ ޑެޕިއުޓީ މޭޔަރ ވިދާޅުވީ ޓްރެފިކް ޤަވައިދާ އެއްގޮތަށް މާލޭ ރިންގް ރޯޑް ފިޔަވައި ހުރިހާ މަގުތަކެއްވެސް މިގޮތަށް ބަދަލުކުރާނެކަމަށާއި، ނަމަވެސް ރިންގް ރޯޑުގައި ލާފައިވާ ކުލައަށް ބަދަލުގެނައުމަށް މިހާތަނަށް ނިންމާފައި ނުވާކަމަށެވެ. ޝަމާއު ވިދާޅުވީ ރިނގް ރޯޑަށް ބަދަލުގެނައުމުގެ ކުރިން ޓްރާންސްޕޯޓް މިނިސްޓްރީއާ މަޝްވަރާ ކުރައްވާނެކަމަށެވެ.
ކުރީގެ ސަރުކާރުން ހައުސިންގ މިނިސްޓްރީގެ ބެލުމުގެ ދަށުން މާލޭ މަގުތަކުގައި ކުރަހާފައިވާ ނިޝާންތައް ހުދުކުލައަށް ބަދަލުކުރިނަމަވެސް، އޭރު ކުރެހި ގިނަ ނިޝާންތައް މިހާރު ވަނީ ފޮހެވިފައެވެ.