މެދު ޒިޔާރާތްމަގު އާއްމު ދަތުރުފަތުރަށް ހުޅުވާލާނީ އަމީރު އަޙްމަދު މަގު ހުޅުވާލުމަށްފަހު އެމަގުގެ ޓްރެފިކަށް އަންނަ ބަދަލުތަކަށް ބަލާފައިކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ޓްރާންސްޕޯޓް މިނިސްޓްރީގެ އޮފިޝަލަކު ވިދާޅުވީ އަމީރު އަޙްމަދުގައި ޖަހާފައިވާ މާރބުލްތައް ނަގައި އެއްގަމު ދަތުރުފަތުރަށް ހުޅުވާލުމުގެ މަސައްކަތް ފެށިނަމަވެސް، މެދު ޒިޔާރާތް މަގުގައި މާރބަލް ޖަހާފައިވާ ސަރަޙައްދު ހުޅުވާލުމުގެ މަސައްކަތް މަޑުޖައްސާލާފައިވާކަމަށެވެ. ޓްރާންސްޕޯޓް މިނިސްޓްރީން ކުރިން ބުނެފައިވަނީ އަމީރު އަޙްމަދު މަގުގެ މަސައްކަން ނިމުމާއެކު މެދު ޒިޔާރާތްމަގު ހުޅުވާލުމުގެ މަސައްކަތް ފަށާނެކަމަށެވެ.
ނަމަވެސް ޓްރާންސްޕޯޓް މިނިސްޓްރީން މިއަދު ބުނީ މެދު ޒިޔާރާތް މަގުގައި މާރބަލް ޖަހާފައިވާ ސަރަޙައްދު އެއްގަމު ދަތުރުފަތުރަށް ހުޅުވާލުމާމެދު ގޮތެއް ނިންމާނީ އަމީރު އަޙްމަދު މަގު ހުޅުވާލުމުން ޓްރެފިކަށް އަންނަ ބަދަލުތަކަށް ބެލުމަށްފަހުކަމަށެވެ.
ކުރީގެ ސަރުކާރުން މެދު ޒިޔާރާތްމަގާއި އަމީރު އަޙްމަދު މަގު ބަންދުކޮށް މާރބްލް ޖަހާފައިވަނީ އިސްލާމީ މަރުކަޒު މައިދާނުގެ ގޮތުގައި އެތަން ތަރައްޤީކުރުމަށެވެ. އެދެމަގު ބަންދުކުރުމުގެ ސަބަބުން މާލޭގެ ކާރުބާރު ބޮޑު ސަރަހައްދެއް ކަމަށްވާ އިސްލާމީ މަރުކަޒުގެ ވަށައިގެންވާ ސަރަހައްދުގެ ޓްރެފިކް ފްލޯއަށް އަދި ބަދަލާގުޅިގެން ޓެކްސީ ޑަރައިވަރުންނާއި، އާންމުން ވަނީ ކަންބޮޑުވުން ފާޅުކޮށްފައެވެ. މި ބަދަލާއެކު އެ ސަރަހައްދުގެ ޓްރެފިކަށް ބޮޑެތި ހުރަސްތަކެއް ކުރިމަތިވެ، ކައިރި އެހެން މަގުތަކާއި ގޯޅިތަކަށް ވަނީ ބާރު ބޮޑުވެފައެވެ.
އަމީރު އަހުމަދު މަގު ހުޅުވުމާއެކު ކުރިން ވެސް އޮތް ގޮތަށް، ހުޅަނގުން އިރަށް އެ މަގުން ދުއްވޭނެއެވެ. މާލޭ މަގުތަކުގައި އާންމުންނަށް ކުރިމަތިވާ ދަތިތަކަށް ހައްލު ހޯދައިދިނުމަށްޓަކައި މިހާރުން މިހާރަށް ކުރެވެންހުރި ކަންކަން ކުރުމަކީ ސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމެނޭ ކަމެކެވެ.