ސަރުކާރު ހިންގާ ޕާޓީ ޕީޕީއެމާއި އެކު ހަދާފައިވާ ކޯލިޝަނުން ވަކިވުމަށް ޖުމްހޫރީ ޕާޓީގެ ކައުންސިލުން މިއަދު ފާސްކޮށްފިއެވެ.އެޕާޓީގެ ކައުންސިލަރ ޖެނެރަލް އަހްމަދު ސަމީރު ވިދާޅުވީ، ޕީޕީއެމާއި އެކު ހަދާފައިވާ ކޯލިޝަނުން ރަސްމީކޮށް ވަކިވުމަށް ޖުމްހޫރީ ޕާޓީން ނިންމީ، ސަރުކާރުގައި ހިމެނޭ އެޕާޓީގެ ބޭފުޅުން މަގާމުން ވަކިކޮށްފައިވާތީ، ކޯލިޝަންގައި ތިބުމަކީ އެންމެ އިންސާފުވެރި ގޮތަކަށް ނުވާތީކަމަށެވެ.ޖުމްހޫރީ ޕާޓީން ކޯލިޝަނުން ވަކިވުމަށް މިއަދު ފާސްކުރި ނަމަވެސް، އަށާރަވަނަ ރައްޔިތުންގެ މަޖިލީހުގެ ރައީސްކަމަށް ޖޭޕީގެ ލީޑަރ ޤާސިމް އިބްރާހިމް ކުރިމަތިލެއްވި ހިސާބުން ޕީޕީއެމުން ވަނީ ޖޭޕީއާއި އެކު ހަދާފައިވާ ކޯލިޝަން ރޫޅާލާފައިވާކަމަށް ބުނެފައެވެ.ޕީޕީއެމްއާ ޖޭޕީ ގުޅިގެން މަސައްކަތް ކުރަން ނިންމާ ކޯލިޝަން އެއްބަސްވުމެއްގައި ސޮއިކުރީ ނިމިގެންދިޔަ ރިޔާސީ އިންތިހާބުގެ ދެވަނަ ބުރުގެ ކެމްޕޭންގެ ދުވަސްވަރުއެވެ.ސަމީރު ވިދާޅުވީ، ގާނޫނު އަސާސީއާ ޚިލާފަށް ސަރުކާރުން ކުރާ ހުރިހާކަމެއް ޖުމްހޫރީ ޕާޓީން ހުއްޓުވުމަށް މަސައްކަތް ކުރާނެކަމަށެވެ. އެގޮތުން ޖުމްހޫރީ ޕާޓީގެ ކައުންސިލުން މިއަދުވަނީ އެޕާޓީގެ ގައުމީ ހިންގާ ކޮމިޓީން ނިންމަންޖެހޭ ހުރިހާކަމެއް ނިންމުމުގެ ބާރު ޕާޓީގެ ލީޑަރ ޤާސިމް އިބްރާހިމަށް ދޭންވެސް ފާސްކޮށްފައެވެ. ނަމަވެސް ލީޑަރު ނިންމަވާ ނިންމެވުންތައް ގައުމީ ހިންގާ ކޮމިޓީއަށް އަންގަން ޖެހޭނެކަމަށްވެސް އޭނާ ވިދާޅުވިއެވެ. މީގެ އިތުރުން ޖުމްހޫރީ ޕާޓީގެ ޒުވާނުންގެ ގޮފީގެ ރައީސްކަމުން އެޕާޓީގެ ކައުންސިލް މެންބަރު މޫސާ އަންވަރު ވަކިކުރުމަށްވެސް ޕާޓީގެ ކައުންސިލުންވަނީ ފާސްކޮށްފައެވެ.މޫސާ އަންވަރު މަގާމުން ވަކިކުރައްވާފައި ވަނީ އޭނާ މިވަގުތު ރާއްޖެއިން ބޭރުގައި ތައުލީމު ހާސިލް ކުރަމުން ގެންދަވާތީ އެމަގާމުގެ މަސްއޫލިއްޔަތު އަދާ ނުކުރެއްވޭތީ ކަމަށްވެސް ސަމީރު ވިދާޅުވިއެވެ.