ޗައިނާގެ އަސްކަރީ މަރުކަޒެއް ޤާޢިމްކުރުމަށް ދިވެހި ސަރުކާރުން ޗައިނާއަށް ލ.އަތޮޅުން ބިމެއް ދޭން ނިންމާފައިވާކަމަށް ވިދާޅުވެ، މޯލްޑިވިއަން ޑިމޮކްރެޓިކް ޕާޓީގެ ލީޑަރު އަދި ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅު ޗައިނާ ސަރުކާރުން ދޮގުކޮށްފިއެވެ.ޗައިނާ އެމްބަސީއިން ރޭ ނެރުނު ބަޔަނެއްގައި، މި ކަން ދޮގުކޮށް ބުނެފައިވަނީ، ދިވެހި ސަރުކާރުން ޗައިނާއަށް ލ. އަތޮޅުން ބިމެއް ކުއްޔަށްދޭން ނިންމާފައިވާކަމަށް ދެކެވެމުންދާ ވާހަކަތަކަކީ ހަޤީޤަތެއް ނެތް ވާހަކަތަކެއްކަމަށެވެ.މި ބަޔާނުގައި ބުނެފައިވަނީ، ޗައިނާއަކީ އަބަދުވެސް އެ ޤައުމުގެ ދިފާޢީ ދާއިރާ ވަރުގަދަކުރުމަށް ގިނަގުނަ މަސައްކަތްތަކެއް ކުރަމުންދާ ޤައުމެއްކަމަށެވެ. ނަމަވެސް، އެހެން އެއްވެސް ޤައުމެއްގައި ޗައިނާގެ އަސްކަރީ މަރުކަޒެއް މިހާތަނަށް ޤާއިމްކޮށްފައި ނުވާނެކަމަށް މި ބަޔާނުގައި ބުނެފައިވެއެވެ.މި ބަޔާނުގައި އިތުރަށް ބުނެފައިވަނީ، ޗައިނާއާއި ރާއްޖެއާއި ދެމެދު އޮތް ޒަމާންވީ ގުޅުން ބިނާވެފައިވަނީ ދެ ޤައުމަށްވެސް ފައިދާއާއި މަންފާ ލިބެނިވި ސިޔާސަތުތަކެއްގެ މައްޗަށްކަމަށެވެ. އަދި މި ސިޔާސަތުތަކުގެ ދަށުން، ފާއިތުވި އަހަރުތަކުގެ ތެރޭގައި ޗައިނާއާއި ރާއްޖެއާއި ދެމެދު އޮތް ދުވަސްވީ ގުޅުން އިތުރަށް ބަދަހިވެ ހަރުދަނާވަމުން އަންނަކަން މި ބަޔާނުގައި ފާހަގަކޮށްފައިވެއެވެ.ޗައިނާއިން ޤާއިމްކުރުމަށް މަސައްކަތް ކުރަމުންދާ މެރިޓައިމް ސިލްކް ރޯޑާއި ބެހޭގޮތުން މި ބަޔާނުގައި ބުނެފައިވަނީ، ސިލްކް ރޯޑް ޤާއިމްކުރުމުގެ މަސައްކަތުގައި ރާއްޖެއިން ޗައިނާއަށް އެއްބާރުލުން ދިނުމަށް އެއްބަސްވެފައިވަނީވެސް، ދެ ޤައުމަށާއި ދެ ޤައުމުގެ ރައްޔިތުންނަށް ފައިދާއާއި މަންފާ ލިބެނިވި އިންތިޒާމްތަކެއްގެ ދަށުންކަމަށް. މީގެ އިތުރުން، ޗައިނާއާއި ރާއްޖެއާއި ދެމެދު އޮތް ގުޅުން އިތުރަށް ހަރުދަނާކުރުމަށް އެހީތެރިވެދީ، ދެ ޤައުމުގެ ގުޅުމަށް ބުރޫއަރާފަދަ ވާހަކަތަކާއި އަމަލުތަކުން ދުރުހެލިވުމަށް މި ބަޔާނުގައި ޗައިނާ އެމްބަސީއިން ރާއްޖޭގެ ސިޔާސީ އިސް ލީޑަރުންނަށް ގޮވާލާފައިވެއެވެ.ދާދިފަހުން އަބޫދާބީއަށް ކުރެއްވި ދަތުރުފުޅެއް ނިންމަވާލެއްވުމަށްފަހު އެނބުރި މާލެ ވަޑައިގެން ރައީސް މުޙައްމަދު ނަޝީދުވަނީ ނޫސްވެރިންނާއި ބައްދަލުކުރައްވާ، ސަރުކާރުން ޗައިނާއަށް ލ. އަތޮޅުން ނުވަދިހަ ނުވަ އަހަރަށް ބިމެއް ދޭން އުޅޭކަމަށް ތުހުމަތުކުރައްވާފައެވެ. އަދި ޗައިނާއާއި ރާއްޖެއާއި ދެމެދު ބަދަހިވަމުންދާ ގުޅުމާއިމެދު ހިތްހަމަޖެހިވަޑައިނުގަންނަވާކަމަށް މީގެ ކުރިންވެސް އެކިއެކި ފޯރަމްތަކުގައި ނަޝީދު ގެންދަވަނީ ވިދާޅުވަމުންނެވެ.