ދިވެހި ތާރީޚަށް އަގުހުރި ޚިދުމަތްތަކެއް ކުރައްވާފައިވާ މަޝްހޫރު ތާރީޚު ޢިލްމުވެރިޔާ އަލްއުސްތާޛު މުޙައްމަދު ވަޙީދު، ނަދުވީގެ ހަނދާނުގައި ތައުޒިޔާގެ ދަފްތަރެއް ދިވެހި ބަހުގެ އެކަޑަމީގައި ހުޅުވައިފިއެވެ.
މަޝްހޫރު ތާރީޚް ލިޔުންތެރިޔާ އަލްއުސްތާޛް މުޙައްމަދު ވަޙީދު، ނަދުވީގެ ހަނދާނުގައި ހުޅުވި ތައުޒިޔާގެ ދަފްތަރުގައި ދިވެހި ބަހުގެ އެކަޑަމީގެ އިސްވެރިންނާއި މުވައްޒަފުންގެ އިތުރުން، ނަދުވީގެ އާއިލާއާއި، އޮމާންގެ އިސްލާމިކް މިނިސްޓަރަށް ލާފާދެއްވާ މުޝީރުވެސް ވަނީ ލިޔުއްވާފައެވެ. އާއްމުންނަށްވެސް ހުޅުވާލައިފައިވާ މި ދަފްތަރު ދެ ހަފްތާވަންދެން ސަރުކާރު ބަންދު ނޫން ކޮންމެ ދުވަހަކު ރަސްމީ ގަޑީގައި ދިވެހިބަހުގެ އެކެޑަމީގައި އޮންނާނެކަމަށް އެ އެކެޑަމީން މައުލޫމާތުދެއެވެ.
ނަދުވީގެ ހަނދާނުގައި ތައުޒިޔާގެ ދަފްތަރު ހުޅުވުމަށްފަހު ވާހަކަދައްކަވަމުން ދިވެހި ބަހުގެ އެކެޑަމީގެ ރައީސް އަޝްރަފް ޢަލީ ވިދާޅުވީ އަލްއުސްތާޛު މުޙައްމަދު ވަޙީދު ދިވެހި ބަހަށް ކޮށްދެއްވާފައިވާ މަސައްކަތްތަކަކީ ދުވަހަކުވެސް ހަނދާނުން ފުހެނުލެވޭފަދަ އަގުހުރި މަސައްކަތްތަކެއްކަމަށެވެ. ނަދުވީ އަވަހާރަވުމަކީ ދިވެހި އަދަބިއްޔާތަށް ގެއްލިގެން ދިޔަ އަގުބޮޑު ޚަޒާނާއެއްކަމަށާއި، ނަދުވީ އަވަހާރަވީއިރުވެސް މުސްތަޤްބަލުގައި ދިވެހިންނަށް ފައިދާކުރާނެ އެތައް މަސައްކަތްތަކެއް ކުރައްވަމުން ގެންދެވިކަމަށް އަޝްރަފް ވިދާޅުވިއެވެ. އެގޮތުން ނަދުވީ އަވަހާރަވީ ރާއްޖޭގެ ތާރީޚުގެ ދިވެހި ތަރުޖަމާގައި ހުރި ކުށްތައް ފިލުވުމުގެ މަސައްކަތް ކުރައްވަމުންދަނިކޮށްކަމަށް އަޝްރަފް ވިދާޅުވިއެވެ.
""ދިވެހި ބަހުގެ އެކެޑަމީއަށް މި ލިބުނީ ދާއިމީ ފަޅުކަމެއް. ނަދުވީ އަކީ ވަރަށް އިޚްލާސްތެރި ތެދުވެރި ޢިލްމީ މަސައްކަތްތަކެއް ކޮށްފައިވާ ބޭފުޅެއް"ދިވެހިބަހުގެ އެކެޑަމީގެ ރައީސް އަޝްރަފް ޢަލީ ވިދާޅުވިއެވެ.
އަލްއުސްތާޛު މުޙައްމަދު ވަޙީދުގެ އާއިލާ މެމްބަރުން ބުނީ ނަދުވީ ކުރައްވާ މަސައްކަތްތައް ބައްޓަންކުރައްވަނީ އަންނަންއޮތް ޖީލުތަކަށް ފައިދާވާގޮތަށްކަމަށެވެ. އަދި ނަދުވީއަކީ އަބަދުވެސް ފޮތް ކިއުމާއި ދިރާސާކުރުމަށް ލޯބިކުރެއްވި ބޭފުޅެއްކަމަށް އާއިލާ މެމްބަރުން ފާހަގަކުރެއެވެ.
އަލްއުސްތާޛް މުޙައްމަދު ވަޙީދު އަވަހާރަވެފައިވަނީ އާލާސްކަންފުޅެއް ޖެހިވަޑައިގެން އިންދިރާ ގާނދީ މެމޯރިއަލް ހޮސްޕިޓަލުގައި ފަރުވާދެމުންދަނިކޮށް މިދިޔަ ޑިސެމްބަރު މަހުގެ 28 ވަނަ ދުވަހުއެވެ.
ދިވެހި ބަހާއި ތާރީޚަށް ޚިދުމަތްކުރާ ޤައުމީ މަރުކަޒާއި، ދިވެހިބަހުގެ އެކެޑަމީގައި ވިއްސަކަށް އަހަރު ޚިދުމަތް ކުރައްވާފައިވާ އަލްއުސްތާޛް މުޙައްމަދު ވަޙީދު ނަދުވީ ވަނީ ދިވެހި ބަހާއި ތާރީޚަށް އެތައް ޚިދުމަތްތަކެއް ކުރައްވާފައެވެ. އެގޮތުން ތާރީޚީ އެތައް ފޮތްތަކެއް ލިޔުއްވައި، ދިވެހި ތާރީޚް ދިރާސާކުރައްވައި އާންމުކުރައްވާފައިވެއެވެ. އަދި ތާރީޚް އުނގަންނައިދިނުމުގެ މަސައްކަތުގައިވެސް އަމަލީގޮތުން އުޅުއްވާފައިވެއެވެ. މީގެ އިތުރުން ނަދުވީވަނީ ރާއްޖެ އިސްލާމިގޮތާމެދު ވަރަށްފުޅާ ދާއިރާއެއްގައި ދިރާސާކުރައްވައި، މި ހާދިސާއާއި، އެކަން ހިނގިގޮތް ވަރަށް ތަފްސީލުކޮށް ލިޔުއްވާފައެވެ.
އަލްއުސްތާޛު މުޙައްމަދު ވަޙީދު "ނަދުވީ" އަވަހާރަވީއިރު ހުންނެވީ ދިވެހިބަހުގެ އެކެޑަމީގެ ޑެޕިއުޓީ ޑިރެކްޓަރގެ މަޤާމުގައެވެ.