އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު ހެޔޮކޮށްފިއެވެ.
އެސްޓީއޯއިން ވަނީ، ޑީސަލް ލީޓަރަކުން ދެ ރުފިޔާ އަދި ޕެޓްރޯލް ލީޓަރަކުން އެއް ރުފިޔާ މިއަދުން ފެށިގެން ހެޔޮކޮށްފައެވެ. އެސްޓީއޯއިން ބުނީ ތެޔޮ ވިއްކާ އަގު ހެޔޮކުރަން ނިންމީ ދުނިޔޭގެ ބާޒާރުގައި ތެލުގެ އަގު ހެޔޮވުމާއި ގުޅިގެން ކަމަށެވެ.
ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯއިން ތެލުގެ އަގަށް މިގެނައި ބަދަލާއި މިއަދުން ފެށިގެން ޑީސަލް ލިޓަރެއް ވިއްކާނީ، 9 ރުފިޔާ 99 ލާރިއަށެވެ. އަދި ޕެޓްރޯލް ލީޓަރެއް ވިއްކާނީ 10 ރުފިޔާ 19 ލާރި އަށެވެ.
މިއީ މި ފަހުގެ ތާރީހުގައި އެސްޓީއޯއިން ތެލުގެ އަގު އެންމެ ބޮޑަށް ހެޔޮ ކުރި ފަހަރެވެ. ރާއްޖޭގެ ބާޒާރުގައި އެންމެ ފަހުން ތެލުގެ އަގަށް ބަދަލު ގެނައީ، މިދިޔަ އަހަރުގެ ނޮވެމްބަރު 13 ވަނަ ދުވަހު އެވެ.
އެސްޓީއޯއިން އެފަހަރު ޑީސަލް ލީޓަރަކުން 80 ލާރި އަދި ޕެޓްރޯލް ލީޓަރަކުން 20 ލާރި އަގުހެޔޮ ކުރިއެވެ. އެ ބަދަލާއެކު ޑީސަލް ލީޓަރެއް އޭރު ވިއްކަމުން އައީ 11 ރުފިޔާ 99 ލާރިއަށެވެ. އަދި ޕެޓްރޯލް ލީޓަރެއް ލިބެން ހުރީ 11 ރުފިޔާ 19 ލާރިއަށެވެ.