އެމްޕީއެލުން ދެމުންދާ ބަސް ދަތުރުގެ ޙިދުމަތުގައި އަތޮޅުގެ ރަށްރަށާއި މާލެއާއި ދެމެދު އެއްވެސް ތަފާތު ކުރުމެއް ނުގެންގުޅޭ ކަމަށް އެކުންފުނިން ހާމަކޮށްފިއެވެ.
އެމްޕީއެލްގެ ސީއީއޯ ޝާހިދު އަލީ ވިދާޅުވީ، އެމްޕީއެލުން ދެމުންދާ އާއްމު ބަސްދަތުރުތަކުގައި ސްކޫލް ކުދިން އަތުން މާލެއާއި ހުޅުމާލެއާއި ދެމެދު ކުރާ ދަތުރުތަކުގައި އަގު ނުނަގާ އިރު، އައްޑޫސިޓީ ސްކޫލްތަކުގެ ކުދިން އަތުން ބަސް ދަތުރުތަކަށް އަގު ނަގާ ކަމަށް ބުނެ ރައްޔިތުންނަށް އޮޅުން އަރާ ފަދަ ގޮތަކަށް ބައެއް ފަރާތްތަކުން ވާހަކަތައް ދައްކަމުންދާކަމަށެވެ. ޝާހިދު ވިދާޅުވީ، އެއީ އެއްވެސް ކަހަލަ ހަޤީޤަތެއް އެކުލެވިގެންވާ ވާހަކައެއްނޫންކަމަށާއި، މާލެއާ ހިލާފަށް އައްޑޫސިޓީ ސްކޫލްތަކުގެ ދަރިވަރުންނަށް ދެމުންދާ ބަހުގެ ޚިދުމަތް ތަފާތުކަމަށެވެ.
"އައްޑޫ ސިޓީ ސްކޫލް ކުދިންނަށް ދޭ ޙިދުމަތާއި މާލޭގައި ދޭ ބަސް ދަތުރުތަކުގެ ޚިދުމަތް ތަފާތު. އައްޑޫސިޓީގައި ދަރިވަރުންނަށް ދޭ ބަހުގެ ހިދުމަތުގައި ކިޔެވުން ފެށޭ ގަޑިއަށް ދަރިވަރުން ސްކޫލަށް ގެންގޮސް ކިޔެވުން ނިމުމުން އެނބުރި ގޭދޮށަށް ދަރިވަރުން ގެންގޮސްދޭނެ. އެއީ އެކުދިންނަށް ހާއްސަކޮށް ޚިދުމަތްދޭ ބަހެއްޝާހިދު އަލީ، އެމްޕީއެލްގެ ސީއީއޯ
މިކަމާއި ގުޅޭގޮތުން އިތުރަށް ވާހަކަދައްކަވަމުން ޝާހިދު ވިދާޅުވީ، މާލެއެކޭ އެއްގޮތަށް އައްޑޫސިޓީގައި އާއްމުންނަށް އަމާޒްކޮށްގެން ދެމުންދާ ބަސް ދަތުރުތަކުގައި، ޔުނިފޯމްގައި ބަހަށް އަރާ ކުދިންގެ އަތުން އަގެއް ނުނަގާ ކަމަށެވެ.
"ސްކޫލް ބަހުގެ ޙިދުމަތުގެ އިތުރުން އައްޑޫ އަތޮޅުގައި އެބައޮވޭ، ޕަބްލިކް ޓްރާންސްޕޯޓުގެ ޙިދުމަތްވެސް، އާއްމުންނަށް ދޭ ބަހުގެ ޙިދުމަތް އެއީ ފޭދޫއިން ހިތަދޫއަށް ހިތަދޫއިން އަބުރާ ފޭދޫއަށް، އެދަތުރުތަކުގައި ޔުނިފޯމްގަ ހުންނަ ކުއްޖަކު ބަހަށް އަރައިފިއްޔާ ހަމަ ހިލޭ ދެވޭނެ، މާލޭގަ ވެސް އޮންނަ އުސޫލުންޝާހިދު އަލީ
އެމްޕީއެލްގެ ސީއީއޯ ޝާހިދު އަލީ ވަނީ އެމްޕީއެލުން ދޭ ބަހުގެ ހިދުމަތުގެ ފެންވަރު ރަގަޅުކުރުމަށް އެކުންފުނިން ގިނަ މަސައްކަތްތަކެއް ކުރަމުންދާކަމަށް ވިދާޅުވެފައެވެ.