މިދިޔަ އަހަރު ރާއްޖޭގެ އިމްޕޯޓް %25 އިތުރުވެ، ރާއްޖޭގެ އެކްސްޕޯޓް %9 ދަށަށް ހިނގައްޖެއެވެ.
މޯލްޑިވްސް ކަސްޓަމްސް ސަރވިސްގެ ތަފާސްހިސާބުތަކަށް ބަލާއިރު، 2018 ވަނަ އަހަރު ރާއްޖެއަށް ވަނީ، 47 ބިލިއަން ރުފިޔާގެ މުދާ އެތެރެކޮށްފައެވެ. މިއީ އޭގެ ކުރީ އަހަރާއި އަޅާބަލާއިރު %25 އިތުރުވުމެކެވެ. 2017 ވަނަ އަހަރު ރާއްޖެއަށް އެތެރެކުރި މުދަލުގެ އަދަދު އުޅެނީ، 38 ބިލިއަން ރުފިޔާގައެވެ.
ހުސްވިއަހަރު ރާއްޖެއަށް އެންމެގިނައިން މުދާ އެތެރެކޮށްފައިވަނީ، ޔޫއޭއީ، ޗައިނާ، އަދި ސިންގަޕޫރުންނެވެ. މިދިޔަ އަހަރު ރާއްޖެއަށް އެތެރެކުރި މުދަލުގެ %18 ޔޫއޭއީ ހިއްސާކުރާއިރު، ޗައިނާއިން ހިއްސާކުރަނީ %17 އެވެ. އަދި ސިންގަޕޫރުން ހިއްސާކުރަނީ %13 އެވެ.
ރާއްޖެއަށް އެތެރެކުރި މުދަލުގެ އަދަދު ހުސްވިއަހަރު އިތުރުވިނަމަވެސް، މި މުއްދަތުގެ ތެރޭގައި ރާއްޖެއިން ބޭރުކުރި މުދަލުގެ އަދަދުވަނީ ދަށްވެފައެވެ. 2017 ވަނަ އަހަރު ރާއްޖެއިން އެކްސްޕޯޓްކުރި މުދަލުގެ އަގު 3 ބިލިއަނަށް އަރާއިރު ހުސްވި އަހަރު މިއަދަދު އުޅެނީ، 2.8 ބިލިއަން ރުފިޔާގައެވެ. މިއީ %9 ދަށްވުމެކެވެ.
2018 ވަނަ އަހަރު ރާއްޖެއިން އެންމެ ގިނަ އަދަދަކަށް މުދާ އެސްކްޕޯޓްކުރި ތިން ޤައުމަކީ ތައިލޭންޑް، ޖަރުމަންވިލާތް އަދި އިނގިރޭސިވިލާތެވެ. ހުސްވިއަހަރު ރާއްޖެއިން އެކްސްޕޯޓްކުރި މުދަލުގެ %36 ތައިލެންޑަށް ކޮށްފައިވާއިރު، %13 އެކްސްޕޯޓްކޮށްފައިވަނީ ޖަރުމަނުވިލާތަށެވެ. އަދި %9 އެކްސްޕޯޓްކޮށްފައިވަނީ އިނގިރޭސިވިލާތަށެވެ.
މޯލްޑިވްސް ކަސްޓަމްސް ސަރވިސްއިން އާއްމުކޮށްފައިވާ ތަފާސްހިސާބަށް ބަލާއިރު، ހުސްވި އަހަރު އިމްޕޯޓް ޑިއުޓީގެ ގޮތުގައި ދައުލަތަށް ވަނީ 3.3 ބިލިއަން ރުފިޔާ ލިބިފައެވެ.