އަމިއްލަ ކޮލެޖްތަކުގައި ފުރަތަމަ ޑިގްރީއަށް ކިޔަވާ ދަރިވަރުންނަށް ބޭނުންވާ ފައިސާ ދަރިވަރުގެ ފަރާތުން އެ ކޮލެޖަކަށް ސަރުކާރުން ފޯރުކޮށްދެއްވާނެކަމަށް ހަޔަރ އެޑިއުކޭޝަން މިނިސްޓަރ ޑރ.އިބްރާހިމް ޙަސަން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ހަޔަރ އެޑިއުކޭޝަން މިނިސްޓަރ ޑރ.އިބްރާހިމް ހަސަން ވިދާޅުވީ އަމިއްލަ ކޮލެޖްތަކާއި އިންސްޓިޓިއުޓްތަކުގައި ކިޔަވާ ދަރިވަރުން ސަރުކާރުގެ ފަރާތުން ފޯރުކޮށްދޭން ޖެހޭ ފައިސާ ފޯރުކޯށްދޭނީ އެ ކުއްޖަކު ކިޔަވަމުންދާ ކޮލެޖެއްގެ އެކައުންޓަށްކަމަށެވެ.
ސަރުކާރުގެ ޔުނިވަރސިޓީތަކުގެ ކޯސްތަކަށް ދައްކަންޖެހޭ އަދަދަށްވުރެ އަމިއްލަ ކޮލެޖްތަކުގައި ކިޔަވައި ދަރިވަރުންގެ ކޯސްތަކަށް ދައްކަންޖެހޭ އަދަދު ބޮޑުކަން މިނިސްޓަރ ވަނީ ފާހަގަކުރައްވާފައެވެ. އެހެންނަމަވެސް އެކަމުގެ ސަބަބުން ސަރުކާރުގެ ޔުނިވަރސިޓީތަކުގެ ކޯސްތަކުގެ އަގު ބޮޑުވެގެން ނުދާނެ ކަމަށް މިނިސްޓަރ ވިދާޅުވިއެވެ.
ރާއްޖެ މިއަދު ޕްރޮގްރާމްގައި ވާހަކަދައްކަވަމުން ހަޔަރ އެޑިއުކެޝަން މިނިސްޓަރ ވިދާޅުވީ ކޮންމެ ތަނެއްގައި ފުރަތަމަ ޑިގްރީއަށް ކިޔެވިނަމަވެސް ދަރިވަރުން މާއްދާއަކުން ފެއިލްވެއްޖެނަމަ ދެން އެދަރިވަރަކު އެ މާއްދާ އަލުން ކިޔަވަންޖެހޭނީ އަމިއްލަ ޚަރަދުގައިކަމަށެވެ. އަދި ކޯހުން ފެއިލްވެ ކޮލެޖުން ކަނޑާލާ ހާލަތެއްގައި ސަރުކާރުން ދަރިވަރުގެ ކިޔެވުމަށް ހަރަދުކުރިވަރު ސަރުކާރަށް ހަވާލުކުރަން ޖެހޭނެ ކަމަށްވެސް މިނިސްޓަރ ވިދާޅުވިއެވެ. މިފަދައިން ވާހަކަފުޅުދައްކަވަމުން މިނިސްޓަރ ވިދާޅުވީ ދަރިވަރުންގެ އެއްވެސް މައްސަލައެއް ނެތި ކޮލެޖްގައި ހިންގަމުން ދިޔަ ކޯހެއް ހުއްޓާލައިފިނަމަ އެ ކޮލެޖުން ސަރުކާރަށް އެ ފައިސާ ދައްކަންޖެހޭނެކަމަށްވެސް މިނިސްޓަރ ވިދާޅުވިއެވެ.
ފުރަތަމަ ޑިގްރީއަށް ހިލޭ ކިޔެވުމުގެ ފުރުޞަތު ހުޅުވާލާފައިވާއިރު ވަކި މުއްދަތަކަށް ޤައުމަށް ޚިދުމަތްކުރަންޖެހެއެވެ. ރާއްޖޭގައި ފުރަތަމަ ޑިގްރީއަށް ހިލޭ ކިޔެވޭނެ އިންތިޒާމް ސަރުކާރުން މިހާރު ހަމަޖައްސައިދީފައިވާއިރު، ރާއްޖޭން ބޭރުގައި މަތީ ތަޢުލީމަށް ކިޔަވާ ދަރިވަރުންނަށްވެސް ފަސޭހަ އިންތިޒާމްތަކެއް ހަމަޖެއްސުމުގެ މަސައްކަތް ހަޔަރ އެޑިއުކޭޝަން މިނިސްޓްރީން އަންނަނީ ކުރަމުންނެވެ.