ސަޤާފީ ދިވެހި ހެދުންތަކާއި އެކު މިއަހަރުގެ ބްރައިޑް ފެއަރ ގެ ޕްރޮމޯޝަނަލް އިވެންޓް ބާއްވައިފި

މިއަހަރުގެ ބްރައިޑް ފެއަރގެ ޕްރޮމޯޝަނަލް އިވެންޓް ބާއްވައިފިއެވެ.

މި ޕްރޮމޯޝަނަލް އިވެންޓަކީ ލިކަމެކް ބްރައިޑް ފެއަރގެ މައި ހަފްލާގެ ކުރިން އާއްމުންނަށް މިއަހަރުގެ ބްރައިޑް ފެއަރގައި ފެނިގެންދާނެ ބައެއް ހެދުންތައް ދައްކާލުމަށްޓަކައި ބޭއްވި އިވެންޓެކެވެ.

ބޮޑުބެރުގެ ހަރަކާތްތަކާއި އެކު ބުރިޖް ވިއުއިން ޕްލެޓްފޯމްގައި ބޭއްވި މި އިވެންޓުގައި ވަނީ ދިވެހި ވަންތަ ހެދުންތަކެއް ދައްކާލާފައެވެ.

މިއަހަރުގެ ބްރައިޑް ފެއަރ އާއި ގުޅޭ ގޮތުން ޕީއެސްއެމް ނިއުސްއަށް މައުލޫމާތުދެމުން ބްރައިޑް މޯލްޑިވްސްގެ ސީއީއޯ މުޙައްމަދު ޝާފީ ވިދާޅުވީ، ދިވެހި ލިބާސް އަދި ދިވެހި ދިގު ހެދުންތައް ޕްރޮމޯޝަނަލް އިވެންޓުގައި ދައްކާލާފައިވާ ކަމަށެވެ.

ލިކަމެކް ބުރައިޑް ފެއަރއަށް ޑިޒައިނަރުންގެ ބޮޑު ތަރުހީބެއް ލިބެމުންދާކަން ޝާފީ ފާހަގަކުރިއެވެ. އެގޮތުން މިހާރުވެސް ސްރީލަންކާގެ ޑިޒައިނަރެއްވެސް ޝޯވްގައި ބައިވެރިވުމަށް އެދިފައިވާ ކަމަށް ޝާފީ ވިދާޅުވިއެވެ.

"މިހާރު ސްރީލަންކާގެ ޑިޒަރިނަރަކުވެސް އެބައިން ރިކުއެސްޓުކޮށްފައި، 10 ހެދުމުގެ ކަލެކްޝަނެއް ދައްކާލުމަށް. ދެން މާލެއިންވެސް ވެޑިން ޑިޒައިނަރެއް ނަގާފައެބަހުރި، ދެން އަދި އިތުރަށް ދެ ޑިޒައިނަރއަކަށް ފުރުސަތު ދޭނަން، ދެން ވަރަށް ޑިމާންޑު ބޮޑުވޭ އަބަދުވެސް ފެއަރގައި ހެދުން ދައްކާލުމަށް" ޝާފީ ވިދާޅުވިއެވެ.

މިއަަހަރުގެ ބުރައިޑް ފެއަރ ބޭއްވުމަށް ހަމަޖެހިފައިވަނީ އަންނަ އޭޕްރީލް މަހުގެ 11 އިން 15އަށެވެ.