މާލޭގައި ޓެކްސީގެ ޚިދުމަތް ދިނުމުގައި އޮންލައިން އެޕްލިކެޝަނެއް މެދުވެރިކޮށް ޚިދުމަތް ދިނުމަށްޓަކައި މަޝްވަރާކުރަމުންދާކަމަށް ޓްރާންސްޕޯޓް މިނިސްތްރީން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަޙްމަދު އާދިލް ވިދާޅުވީ އޮންލައިން އެޕްލިކޭޝަން މެދުވެރިކޮށް ޚިދުމަތް ދިނުމަށްޓަކައި ކުރަންޖެހޭ ދިރާސާތައްވެސް މިހާރު ކޮށް ނިމިފައިވާކަމަށެވެ. އަދި މި ޚިދުމަތަށް ނަގާނެ އަގުތައް ކަނޑައަޅައި ނިމިފައިވާކަމަށާއި މިހާރު ކުރަމުންދަނީ މި އަގުތައް ފައިނަލް ކުރުމުގެ މަސައްކަތް ކަމަށް އޭނާ ވިދާޅުވިއެވެ.
ސްޓޭޓް މިނިސްޓަރ ވިދާޅުވީ އަގުތައް ކަނޑައެޅުމުގައި އާއްމު ރައްޔިތުންނާއި ޓެކްސީ ޑްރައިވަރުންގެ މަސައްލަހަތައް ބަލައި އަގުތައް ކަނޑައަޅާއިރު މިހާރު ޓެކްސީތަކަށް ދައްކަމުންދާ އަގަށްވުރެ ހެޔޮ އަގެއް ކަނޑައެޅިގެންދާނެކަމަށެވެ.
"މިކަން ކުރާއިރު ފުރުޞަތު ތަކެއް ދޭންޖެހޭ ޓެކްސީ ދުއްވާ ފަރާތްތަކަށްވެސް. އެ ފުރުޞަތު ދިނުމަށްފަހު އެކަމަށް ސަރުކާރުން ބަދަލު ގެންނަވާނީ. މިހާރު މި ނަގާ އަގުތަކަށް ބަދަލުގެނައުމަށް މަޖުބޫރުވޭ. ރައްޔިތުން ވަރަށް ބޮޑަށް ކަންބޮޑުވޭ މިހާ ބޮޑެތި އަގުތަކެއް ނަގަމުންދާތީ." ސްޓޭޓް މިނިސްޓަރ ވިދާޅުވިއެވެ.
ޓެކްސީތަކުން ނަގާ އަގުތައް ކަނޑައެޅުމަށްޓަކައި އާއްމުންނާއި ޓެކްސީ ޑްރައިވަރުން ހިމެނޭހެން ވަނީ ޚީޔާލު ހޯދުމުގެ ފޯރަމެއްވެސް ބާއްވާފައެވެ.
މާލެއާއި ހުޅުމާލޭގައި ޓެކްސީ ދަތުރަކަށް 25 ރުފިޔާ ނަގަމުންއައި ނަމަވެސް، ބްރިޖު ހުރަސްކޮށް މާލެއާއި ހުޅުލެއާއި ހުޅުލެއަށް ކުރާ ޓެކްސީ ދަތުރުތަކުން އެކި ފަހަރު އެކި އަގުތައް ނަގަމުންދާއިރު، އެކަން ކޮންޓްރޯލް ކުރުމުގެ ގޮތުން ޓްރާންސްޕޯޓް މިނިސްޓްރީން މިހާރުވެސް ވަނީ ވަކި އަގުތަކެއް ކަނޑައަޅާފައެވެ.
އެގޮތުން ހުޅުލެއާއި މާލެއާ ދެމެދުގެ ކުރާ ޓެކްސީ ދަތުރުތަކުގެ އަގަކަށް ކަނޑައަޅާފައިވަނީ 35 ރުފިޔާއެވެ. އަދި މާލެއާއި ހުޅުމާލެއާ ދެމެދު ކުރާ ދަތުރުތަކުގެ އަގަކަށް ކަނޑައަޅާފައިވަނީ 40 ރުފިޔާއެވެ. އެހެންނަމަވެސް ޓްރާންސްޕޯޓް މިނިސްޓްރީން އަގުތައް ކަނޑައެޅިކަމުގައިވީނަމަވެސް ޓެކްސީ ޑްރައިވަރުން ދަތުރުތައް އަދިވެސް ކުރަމުންދަނީ ކަނޑައަޅާފައިވާ އަގުތަކާ ޚިލާފަށެވެ. އެގޮތުން މާލެއާއި ހުޅުލެއާއި، ހުޅުމާލެއާއި މާލެއާ ދެމެދު ޓެކްސީ ދަތުރުތައް މިހާރު އާއްމުކޮށް ކުރަނީ 100 ރުފިޔާއަށެވެ.