ފުވައްމުލަށް ސިޓީގައި ދެ ސައިކަލެއް ޖެހި އެކްސިޑެންޓްގައި ހިނގާ ތިން މީހަކަށް އަނިޔާވެއްޖެއެވެ.
މި އެކްސިޑެންޓް ހިނގާފައިވަނީ ފުވައްމުލަށް ސިޓީގެ ފުނާޑު ހައިވޭ ރެސްޓް ކައިރިން ދުއްވާފައިދިޔަ ދެ ސައިކަލް ޖެހިއެވެ. މި އެކްސިޑެންޓް ހިނގާދިޔައީ މިއަދު މެންދުރު 14:15 ހާއިރުއެވެ. ފުލުހުން ވިދާޅުވީ އެކްސިޑެންޓްވި ދެ ސައިކަލްގެ ތެރެއިން އެއް ސައިކަލް ދުއްވަން އިނީ ސްރީލަންކާގެ ރައްޔިތެއް ކަމަށެވެ. އަދި އޭނާއަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ވިދާޅުވެއެވެ.
އެގޮތުން އޭނާގެ ކަނާތު ފައި ބިނދި ކަނާތު އަތް ބިންދައިގެން ގޮސްފައިވާކަމަށް ފުލުހުން ވިދާޅުވެއެވެ. އަނެއް ސައިކަލް ދުއްވަން އިން 18 އަހަރުގެ މީހާއާއި އެ ސައިކަލް ފަހަތުގައި އިން 24 އަހަރުގެ މީހާއަށް ވެސް އެކި ވަރުގެ އަނިޔާ ލިބިފައިވާކަމަށް ފުލުހުން ވިދާޅުވެއެވެ.
މި އެކްސިޑެންޓް ހިނގައިގެން އުޅޭކަމުގެ މައުލޫމާތު ފުލުހުންނަށް ލިބުމާއި ގުޅިގެން ފުލުހުން އެ ސަރަހައްދަށް ދިޔައިރު އެ 3 މީހުން ހޮސްޕިޓަލަށް ގެންގޮސްފައިވާ ކަމަށެވެ.