ޕީއެސްއެމްގެ ޓެލެވިޜަން މޯލްޑިވްސްއިން ކޮންމެ އަހަރެއްގެ ރަމަޟާންމަހު ގެނެސްދޭ "ދިވެހިރާއްޖޭގެ އެންމެ އަލިގަދަ ތަރި" މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ.
ޕީއެސްއެމްގެ މައި ޓީވީ ޗެނަލް ޓެލެވިޜަން މޯލްޑިވްސް އިން ކޮންމެ އަހަރެއްގެ ރަމަޟާންމަހު ގެނެސްދޭ "ދިވެހިރާއްޖޭގެ އެންމެ އަލިގަދަ ތަރި" އަކީ ކީރިތި ޤްރުއާން ކިޔެވުމުގެ މުބާރާތެއްގޮތުގައި ކުރިއަށްގެންދާ ޕްރޮގްރާމެކެވެ. 2013 ވަނަ އަހަރު ގެނެސްދޭން ފެށި މި މުބާރާތަށް ކޮންމެ އަހަރަކުވެސް އާއްމުންގެ ބޮޑު ތަރުހީބެއް ލިބެއެވެ.
މިއަހަރުގެ ރަމަޟާންމަހުވެސް މި މުބާރާތް ކުރިއަށް ގެންދިއުމަށް ނިންމައި، މުބާރާތުގައި ބައިވެރިވުމުގެ ފުރުޞަތު މިހާރު ވަނީ ހުޅުވާލާފައެވެ. އެގޮތުން އުމުރުން 18 އަހަރާއި 35 އަހަރާ ދެމެދުގެ ކޮންމެ މީހަކަށްވެސް މި ފުރުޞަތު މިހާރު ވަނީ ހުޅުވާލާފައެވެ.
މި މުބާރާތުގައި ބައިވެރިވާން ބޭނުންވާ ފަރާތްތަކުން އީޓީ ޖެއްސެވުމަށްފަހު، ނަމާއި، އުމުރާއި، އޮޑިޝަންގައި ބައިވެރިވާ ސަރަޙައްދު ޖެއްސެވުމަށްފަހު 300 އަށް އެސްއެމްއެސް ކުރުމުގެ ފުރުޞަތު މިމަހުގެ 15 ވަނަ ދުވަހާ ހަމައަށް ވަނީ ހުޅުވާލާފައެވެ.
މިއަހަރުގެ މުބާރާތުގެ އޮޑިޝަންތައް ރާއްޖޭގެ 4 ސަރަހައްދެއްގައި ބޭއްވުމަށް ޕީއެސްއެމުން ވަނީ ނިންމާފައެވެ. އެއީ ހއ. އިހަވަންދޫ، ރ. ދުވާފަރު، ގދ. ތިނަދޫ އަދި މާލެ ސިޓީއެވެ.
ޓީވީއެމުން "ދިވެހިރާއްޖޭގެ އެންމެ އަލިގަދަ ތަރި" މުބާރާތް ކުރިއަށްގެންދާ މިއީ 7 ވަނަ އަހަރެވެ. 18 އަހަރުން މަތީގެ މީހުންނަށް އަމާޒުކޮށް ކުރިއަށްގެންދަންފެށި މި މުބާރާތް މިދިޔަ އަހަރުވަނީ ކުޑަކުދިންނަށް ޚާއްޞަކޮށްގެން "ދިވެހިރާއްޖޭގެ އެންމެ އަލިގަދަ ތަރި ޖޫނިއަރ" ގެ ނަމުގައި ކުރިއަށްގެންގޮސްފައެވެ.
އެންމެ އަލިގަދަ ތަރި ޕްރޮގްރާމަކީ ޕަބްލިކް ސަރވިސް މީޑިއާއިން އިންތިޒާމުކޮށްގެން ޢާއްމުންނަށް ޤުރުއާން ކިޔެވުމުގެ ހުނަރާއި، ޤުރާއާނާމެދު މުޖުތަމަޢުގައި އޮންނަ ޤަދަރު މަތިކޮށް، ކީރިތި ޤުރުއާނާމެދު ޢާންމުންގެ ހިތްތަކުގައި ލޯބިޖެއްސުމުގެ ގޮތުން ގެނެސްދޭ ޕްރޮގްރާމެކެވެ.