ކުދި އަދި މެދު ފަންތީގެ ވިޔަފާރިތަކަށް ފަހި މާހައުލެއް ޤާއިމްކޮށްދިނުމަށްޓަކައި ޤާއިމްކުރާ އެސްއެމްއީ ޕޮލިސީ، އެކުލަވާލުމުގެ މަސައްކަތްކުރަމުންދާ ކަމަށާއި، އެ ޕޮލިސީ ވަރަށް އަވަހަށް އިއުލާން ކުރާނެ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވެއްޖެއެވެ.
ކުދި އަދި މެދު ފަންތީގެ ވިޔަފާރިތަަކަށް ލޯން ދޫކުރުމަށް އުފައްދާފައިވާ އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން ޕްރައިވެޓް ލިމިޓެޑު، އެސްޑީއެފްސީގެ ޙިދުމަތްތައް އިފްތިތާހްކުރުން ފާހަގަކުރުމަށް ނޭޝަނަލް އާޓް ގެލެރީގައި ބޭއްވި ހަފްލާގައި ވާހަކަދައްކަވަމުން އިކޮނޮމިކް މިނިސްޓަރ ވިދާޅުވީ އެ ޕޮލިސީއާއެކު ސަރުކާރުގެ މަޝްރޫޢުތަކުގައި ފަސޭހައިން ބައިވެރިވެވޭ ނިޒާމެއް ޤާއިމްކުރެވިގެންދާނެ ކަމަށެވެ.
" އަޅުގަނޑުމެން މިމަސައްކަތްކުރަނީ އެ ޕޮލިސީގެ ތެރޭގައި، ކުދި އަދި މެދު ފަންތީގެ ވިޔަފާރިތަކަށް ސަރުކާރުގެ ޕްރޮޖެކްޓްސްތަކުގައި ފަސޭހައިން ބައިވެރިވެވޭނެ ނިޒާމެއް ޤާއިމްކުރުން، މިހާރު ވެއްޖެޔާމުން، އަލަށް ފަށާ ކުޑަ ވިޔަފާރިއަކަށެއް، ޕްރޮޖެކްޓެއް ލިބޭނެ ގޮތެއް ނެތް، އެކްސްޕީރިއެންސް ނެތުމުން، އެހެން ނަމަވެސް އަޅުގަނޑުމެން ވަކި ކުރައިޓީރިއާތަކެއް ކަނޑައަޅައިގެން އެފަދަ ފުރުސަތުތަކެއް ހުޅުވާލުމަށް މަސައްކަތް ކުރަމުން މިދަނީ،" މިނިސްޓަރ ފައްޔާޟް ވިދާޅުވިއެވެ.
އެސްއެމްއީ ޕޮލިސީއެއް އެކުލަވާލުމަކީ ސަރުކާރުގެ ސަތޭކަ ދުވަހުގެ ވަޢުދުތަކުގެ ތެރޭގައި ހިމެނޭ ކަމެކެވެ.
މީގެއިތުރުން މިނިސްޓަރ ފައްޔާޟް ވިދާޅުވީ ރާއްޖޭގައި ޓެކްސްގެ ނިޒާމް މާނަ ކުރެވިފައިވާ ގޮތުން ރާއްޖޭގެ ވިޔަފާރިކުރާ ފަރާތްތަކަށް ދަތިތަކާއި ކުރިމަތިލާން ޖެހިފައިވާ ކަމަށެވެ. އެހެންކަމުން ރާއްޖޭގެ ޓެކްސްގެ ނިޒާމް ހަރުދަނާކޮށް، ވިޔަފާރިތަކަށް ފަސޭހަވާނެ ގޮަތަކަށް ޓެކްސްގެ ނިޒާމަށް ބައްދަލުތައް ގެނައުމުގެ މަސައްކަތް ކުރަމުންދާ ކަމަށް މިނިސްޓަރ ވިދާޅުވިއެވެ.