ޕީއެސްއެމްގެ ދިވެހިރާއްޖޭގެ އަޑުން ކޮންމެ އަހަރެއްގެ ރަމަޟާންމަހު ގެނެސްދޭ ކުރުވާހަކަ މުބާރާތުގައި ބައިވެރިވުމުގެ ފުރުޞަތު ޢާއްމުކޮށް ހުޅުވާލައިފިއެވެ.
މިިއީ ދިވެހި ބަހުގެ ކިޔުންތެރިކަމާއި ހުށަހެޅުންތެރިކަމުގެ ފަންނު ދިރުވައި އާލާކޮށް، އެ ފަންނާމެދު މީހުން ޝައުޤުވެރި ކުރުވުމުމުގެ މަޤްޞަދުގައި ދިވެހިރާއްޖޭގެ އަޑުން ކުރިއަށްގެންދާ މުބާރާތެކެވެ. މީގެ އިތުރުން މި މުބާރާތް މެދުވެރިކޮށް އަދަބީ ގޮތުންނާއި، ފިކުރީގޮތުން ފެންވަރުރަނގަޅު އުފެއްދުންތަކަށް މަގުފަހިކޮށް، އެފަދަ އުފެއްދުންތަކުގެ ޒަރިއްޔާއިން، މުޖުތަމަޢަށް ރަނގަޅު މެސެޖުތަކެއް ފޯރުކޮށްދީ ދިވެހި ބަހުން ކުރުވާހަކަ ލިޔުމުގެ ފަންނު ދިރުވައި އާލާކުރުމަކީވެސް މި މުބާރާތުގެ މަޤުޞަދެކެވެ.
މި މުބާރާތުގައި ބައިވެރިވުމަށް ވަކި އުމުރުފުރާއެއް ނެތްނަމަވެސް ޕްރޮފެޝަނަލް ވާހަކަ ލިޔުންތެރިންނަށާއި ކުރިން މިމުބާރާތުގައި ބައިވެރިވެ އެއްވަނަ ހޯދާފައިވާ ފަރާތްތަކަށް މުބާރާތުގައި ބައިވެރިވުމުގެ ފުރުޞަތެއް ނޯވެއެވެ. މި މުބާރާތަށް އެކަކަށް އެއްވާހަކައަށްވުރެ ގިނަވާހަކަ ލިޔުމާއި ކިޔުމުގެ ފުރުޞަތުވެސް އޮވެއެވެ.
މި މުބާރާތަށް ހުށަހަޅާ ވާހަކައެއް ކިޔުމުގައި 19މިނެޓަށްވުރެ ކުރުވެގެން ނުވާނެއެވެ. އަދި 21 މިނިޓަށްވުރެ ދިގުވެގެން ނުވާނެއެވެ. ދިވެހިރާއްޖޭގެ އަޑުން ގެނެސްދިނުމަށް ހަމަޖެހިފައިވާ މި މުބާރާތުގައި ވަނަވަނައަށްދާފަރާތްތަކަށް ފައިސާގެ އިނާމްދިނުމަށް ހަމަޖެހިފައިވެއެވެ. މިގޮތުން މުބާރާތުގެ ލިޔުންތެރިކަމުގެ ބައިން އެވަނައަށްދާ ފާރާތަކަށް ދިހަހާސް ރުފިޔާ ދިނުމަށް ވަނީ ހަމަޖެހިފައެވެ. ދެވަނައަށް ހަތްހާސް އަދި ތިންވަނައަށްދާ ލިޔުންތެރިއަކަށް ފަސްހާސްރުފިޔާ ދޭގޮތަށް ވަނީ ނިންމާފައެވެ.
މިމުބާރާތުގެ ކިޔުންތެރިކަމުގެ ބައިން އެއްވަނައަށް ދާފަރާތަކަށް ފަސްހާސް، ދެވަނައަށް ތިންހާސް އަދި ތިންވަނައަށްދާ ފަރާތަކަށް ދެހާސް ރުފިޔާ އިނާމެއްގެ ގޮތުގައި ދިނުމަށް ވަނީ ނިންމާފައެވެ.
މި މުބާރާތުގައި ބައިވެރިވުމަށް އެދި އަންނަމަހުގެ 15ވަނަ ދުވަހުގެކުރިން ދިވެހިރާއްޖޭގެއަޑަށް ފޯމް ހުށައަޅަންޖެހެއެވެ.
ކޮންމެ އަހަރަކު ރަމަޟާންމަހު ދިވެހިރާއްޖޭގެ އަޑުން ކުރިއަށްގެންދާ ކުރުވާހަކަމުބަރާތަކީ އާއްމުންގެ ބޮޑު ތަރުޙީބެއް ލިބިފައިވާ މުބާރާތެކެވެ. ވޭތުވެދިޔަ އަހަރުތަކުގައި ބޭއްވި މިފަދަ މުބާރަތްތަކުން މުޖުތަމަޢުއަށްވަނީ އަގުހުރި މެސެޖްތަކެއް ދޫކޮށްލާފައެވެ.